Homeरमन के गोठ(रमन चो गोठ)(हल्बी) : आकाशवाणी ले प्रसारित होतो बिती बिशेष कार्यक्रम (दिनांक 10 जुलाई 2016, समय-प्रातः 10.45 से 11.05 बजे)

Secondary links

Search

रमन के गोठ(रमन चो गोठ)(हल्बी) : आकाशवाणी ले प्रसारित होतो बिती बिशेष कार्यक्रम (दिनांक 10 जुलाई 2016, समय-प्रातः 10.45 से 11.05 बजे)

जमाय सुनतो लोग मन के जोहार!
पुरूष उद्घोषक की आरे से:-

  • आकाशवाणी चो महत्वपूर्ण प्रसारण ‘‘रमन चो गोठ’’ ने आपन सपाय के हार्दिक स्वागत करूंसे, अभिनंदन करूंसे।
  • जमाय सुनतो लोग मन! आजी ‘‘रमन चो गोठ’’ चो 11वीं कड़ी चो प्रसारण होयसे। ये बेरा ने आमी माननीय मुख्यमंत्री महोदय डॉ. रमन सिंह जी चो स्वागत करूंसे ।

मुख्यमंत्री जी द्वारा हल्बी में जवाब

  • जमाय -संगी-संगवारी, सियान-सजन, आया -बहिन मन के मोचो जोहार।
  • मौसम बदले से अउर आमचो पानी बादर चो दिन इलीसे मौसम ने आमन मन के राहत मिरली अउर जितलो घाम के आमी भोगलूसे दुई-तीन महिना पानी बाट दखते रलू अउर पानी मारतो शुरू होउंन गेली।
  • ये मौसम नुवा-नुवा बुता चो मौसम बले आय।
  • ये मौसम ने स्कूल कॉलेज खुलेसे।
  • ये मौसम ने किसान मन के नुवा आसा रहेसे।
  • ये मौसम ने नुवा रूख-राई लगातोर होयसे।
  • ये मौसम ने खेती-किसान चो काम, बीजा पेर तोर बले होयसे।
  • ये मौसम ने तराई, झोड़ी, डोबरी, चुवा, नंदी, बांध बले लबालब भरूंन जायसे अउर आमचो बरख भर चो काम बले एयसे।

महिला उद्घोषक द्वारा

  • मुख्यमंत्री साहेब खुबे सत्ते संागलास आपन जेकि चमास चो मौसम खुबे असन नुवा-नुवा उम्मीद के जगाउ आय। चमास चो संगे आमचो अन्न दाता किसान अउर हुनचो परिवार चो लोग खेती चो तैयारी में लगुन गेलासोत। माननीय मुख्यमंत्री साहेब काय ये ‘प्रधानमंत्री फसल बीमा योजना’ चो बारे ने गोठियातो चो सही समय आय?

उत्तर मुख्यमंत्री जी द्वारा

  • सबले पहिल तो मै सपाय किसान अउर भाई अउर बहिन मन चो अउर हुनचो परिवार चो लोग के शुभकामनाएं देयसे, जेकि चमास चो एई मौसम हुन मन चो काजे मंगलकारी होओ।
  • आपन मन कृषि विभाग चो अमला अउर विशेषज्ञ मन चो सलाह नेउन सही समय ने पेरतो काम के करा, अउर खत बीजा बले सही मात्रा ने बुना।
  • ये बेरा बेड़ा ने उतरून खुब मेहनत करतो चो आय, अउर फसल के बचातो उपाय चो बारे ने बले बिचार करतो चो आय।
  • प्रधानमंत्री फसल चो बीमा चो बारे ने जानतो अउर खरीब फसल 2016 चो काजे हुन ने आपलो भागीदारी करतो चो येई सही बेरा आय। धीयान राखा, योजना ने शामील होतो चो आखीरी तारिख 31 जुलाई आय।
  • येई योजना ने बैंक अउर सोसायटी ले कर्जा नेतो बिता किसान अउर कर्जा नी नेतो बिता किसान अउर बाटाने खेती करतो किसान बले शामिल होउक सकदे।
  • येई योजना सिचाई बिती अउर सिचाई नी करतो बिती धान, जुनधरा, सोयबीन, मूंगफल्ली, कांदुल (राहर) मूंग अउर उड़दा चो फसल काजे आय।
  • खरीब फसल चो काजे किसान भाई मन के केवल दूई प्रतिशत चो राशि प्रीमियम चो रूप ने देउक पढ़ेदे। हुन चो उपर चो जितलो बले प्रीमियम लागेदे, हुना के राज्य अउर केन्द्र शासन देदे।
  • उदाहरण काजे, राजनांदगांव जिला ने सिंचित खेती चो मूल्यांकन 33 हजार रूपया प्रति हेक्टेयर आय, तो येचो दूई प्रतिशत माने मात्रा 660 रूपया राशि प्रीमियम तैय होयदे।
  • नुकसान चो भरपाई सिचाई करतो, सिचाई नी करतो फसल के चो अनुसार घाटा चो 70 ले 90 प्रतिशत तक करतो होयदे, अउर मुआवजा बले निर्धारित बेरा ले मीरेदे।
  • कृषि ऋण चो सीमा
  • आमचो सरकार दुई ठन बडे़ फैसला नेउन भाति अल्पकालीन खेती ऋण चो सीमा 5 लाख रूपया तक बढ़ाउन देलीसे, येचो मतलब येदाय किसान भाई 5 लाख रूपया तक चो ब्याज माफी खेती चो कर्जा नेउन भाति आपलो खेती के खुब फायदा चो बनाउक सकदे।
  • येचो बाद अउर बले ब्याज अनुदान चो पात्रता काजे प्रति हेक्टेयर, सिचाई नी करतो भूमि उपरे 20 हजार रूपया चो  अउर सिचाई करतो भूमि उपरे 25 हजार रूपया चो आगे ले चलतो ऋण सीमा के बंद करूंन दिया गेलीसे।येई दुनो फैसला किसान भाई मन के आर्थिक रूप ले मजबूत बनादे।
  • मैं किसान भाई मन ले अपील करेसे कि खेती किसानी चो  कामने भिडुन जाओत। आपन मन सपाय के खुबे फसल काजे शुभकामना देयसे।
  • आपन मन आगे बाढा, आपन मन चो संगे पूरा सरकार उबा आसे।

पुरूष उद्घोषक द्वारा

  • चमास ने जसन बेडा मन ने बीजा पेरूक होयसे उसने मनुक चो जीवना ने पीला बेरा ने शिक्षा अउर संस्कार चो बीजा बुनुक होयसे। चमास चो संगे-संगे नुवा शिक्षा सत्र चो रिश्ता जुड़लीसे। पीला मन, जुवान मन, गुरूजी मन अउर समाज ले आपन काय उम्मीद करा सहास।

मुख्यमंत्री जी द्वारा

  • आपन सत्ते सांगलस। चमास चो येतो चो संगे नुवा शिक्षा सत्र चालु होउंन गेलीसे। स्कूल-कॉलेज नेे भर्ती होतो बिता जमाय पीला अउर जुवान मन के मोचो शुभकामना।
  • कितलोय पीला असन आत, जेकि पहेली हार पहिल बरख स्कूल जासोत। ये साल हुन मन चो मन ने स्कूल चो जसन छबि बनेदे, हुन जीवनभर हुन चो काम एयदे।
  • पीला मन के असन समझ येतोर आसे कि शिक्षा चे हुन चो जीवन के सुधारतो काजे सबले बड़े माध्यम आय।
  • पीला मन के स्कूल ने अच्छा वातावरण मिरतोर चाहिए। येबेई ले अगर शिक्षा चो गुणवत्ता उपरे धियान दिलोने स्कूल चो व्यवस्था ने लगातार सुधार होयदे अउर पीला मन चो नींव बले मजबूत होयदे।
  • पीला मन के लगातार रोजे स्कूल पठातो जरूरी आय, येई काम ने  जितलो भूमिका गुरूजी मन चो बहिनजी मन चो होयसे उतलेई आया-बाबा अउर समाज चो बले होयसे।
  • नारी सशक्तीकरण चो मुर होयसे शिक्षा, बेटी हो चाये बेटा, सबके एक बराबर समझतो आय। काय काजे बल्लो ने कि पढ़ाई चो कारण बेटी मन समाज ने पुरूष मन। पुरूष मन चो ले खुबे मुकाबला करलासोत। अउर बडे़ -बडे़ प्रतियोगिता मन ने अच्छा जगह हासील करतोने सफल होलासोत

महिला उद्घोषक

  • एकदम सत्ते सांगलास मुख्यमंत्री साहेब, आपन सही ने शिक्षा चो जोत जगाउंन आमी नुवा पीढ़ी चो जीवन के सुधराउक सकासे। आपन गेलो महिना ले लोक सुराज अभियान चो चलते खुबे गॉव मन बुललास। काय आपन के शिक्षा चो जोतजगातो चो कोनी असन उदाहरण मिरली, जेचो ले दुसर गॉव शहर अउर पीला मन के लाभ मिरूक सकेदे।

मुख्यमंत्री जी द्वारा

  • लोक सुराज अभियान खुबे असन अनुभव येइे यात्रा चो चलते मोके निरली अउर मोके हरीक बले लागली, येइे शिक्षा चो क्षेत्र ने गोटोक बडे़ प्रयोग स्थानीय स्तर ने आमचो ग्रामीण गुरूजी बहिन जीम न चो द्वारा करतोर होयसे अउर नुवा जिम्मेदारी चो संगे अच्छा तरीका ले काम करतो ने जुटलासोत, मै गोटोक उदाहरण देउंक चाहेंसे कि गोटोक नुवा जिला चो छोटे असन गांव ने जहां मोचो लोक सुराज अभियान चो चलते जाउक होली।
  • गरियाबंद जिला चो छुरा विकासखण्ड चो गॉव अकलवारा ने सरकारी हायर सेकेण्डरी स्कूल आसे। येई स्कूल चो प्राचार्य श्री जी.पी वर्मा व्याख्याता, श्री एस.के.वर्मा अउर वरिष्ठ नागरीक श्री पूरन सिंह ठाकुर गोठोक उदाहरण हुन मन प्रस्तुत करलासोत, कि हर दिन बिहाने 4 बजे उठुन भाति गॉव चो गली मन ने सीटी बजाउआत, अउर पीला मन के बडे़ बिहाने उठुन भाति पढ़तो काजे बसुक लाये उकसासोत।
  •  ये लोग मन आपलो प्रभात फेरी चो बेरा हाजिरी रजिस्टर बले संगे रखसोत ताकि कोनी पीला छूटे नी अउर जुगे किसम चो मद्द करूआत, जसन कि हर रविवार के बिशेष कक्षा बेमार पीला मन के अस्पताल नेतोर, गरीब पीला मन के जूता -चप्पल अउर जरूरी समान बेतोर, पालक (बाप-बिता) मन के मंद अउर दुसर नशा ले दूर रहतो चो सलाह बले देउआत।
  • असनेच कामके पूरा गॉव ने शिक्षा चो गोटोक निको वातावरण बनलिसे, जेचो परिणाम ये होली कि ये बरस हुता कक्षा 10वीं अउर 12वीं चो परीक्षा परिणाम शतप्रतिशत ईलीसे।
  •  ये नवाचार चमत्कारिक आसे। ये में न कोनी ने साधन मांगला, न सुविधा मांगला। बस आपलो जिम्मेदारी समझला अउर गोटोक संकल्प के धरून पीला मन चो भविष्य सावरतो काजे लागला।
  • मैं ग्राम अकलवारा चो शिक्षक मन के, पीला मन अउर पालक (बाप-बिता) मन के जो गोटोक अभिनव परयास करसोत, बधाई देउक चाहेंसे।

गुरू पूर्णिमा

  • 19 जुलाई गुरू पूर्णिमा आसे। ये दिन आमी गुरू जन मन के सुरता करूंसे, हुन मन चो सम्मान करूंसे। गुरू अउर गोविन्द अर्थात् (माने) भगवान ले गुरू के येचो काजे श्रेष्ठ मानलासोत, कायकाज कि गुरू बाटले देतो बिती शिक्षा लेइ आमके भगवान चो बारेने पता चलुआय।
  • भारत ने तो गुरूकुल चो परम्परा रलीसे, जेमे गोटोक अवस्था (उमर)चो पाटकुति पीला मन चो जीवना के संवारतो ने माय-बाप चो जुगे भूमिका गुरू चोये होउआय। मै कामना करेसे कि आमचो शिक्षक समुदाय गुरू- शिष्य चो हुन परम्परा के आपलो आदर्श बनावा। थापड़ी दुनो हाथ ने बाजूआय हुनी काजे पीला मन अउर पालक (माय-बाप) चो बले कर्तब्य आसे कि हुन मन गुरूजनों (गुरू मन) केे पूरा सम्मान देवो अउर हुन मन चो गोठ के मानोत।


पुरूष उद्घोषक द्वारा

  • मुख्यमंत्री जी, पानी बेरा ने नुवा संस्कार रोपतोर अउर शिक्षा चो गोठ चलेसे। सिरप स्कूली पीला मन चो उपरे नइ मांतर किशोर (पीला) अउर जुवान मन चो उपरे बले तुमन मन खुबे धियान देसात। आजी काली ‘युवा नीति’ (जुवान नीति) बनातो चो तैयारी चो बारे ने बले खुबे चर्चा आसे, आपन ये बारे ने काइ बले बलुक चाहसात?

मुख्यमंत्री जी द्वारा

  • हव, जुवान मन उपरे धियान देतो चो गोठ अउर येचो काजे परयास आमी खुबे पहिल शुरू करलुसे।
  • छत्तीसगढ़ चो जुवान मन के राष्ट्रीय अउर अंतर्राष्ट्रीय स्तर चो हुन संस्था मन ने शिक्षा ग्रहण करतो चो अवसर मिरो। येचो काजे अमन मन परयास करलूं अउर हुन चो संगेच-संगे राष्ट्रीय स्तर चो शिक्षण संस्थान छत्तीसगढ़ ने स्थापित होलीसे ये गौरव चो बिषय आय छत्तीसगढ़ चो कि छत्तीसगढ़ ने आईआईटी., एनआईटी, ट्रिपल आईटी, एम्स, नेशनल लॉ यूनिवर्सिटी, आईआईएम, सपाय आमचो थाने आसे।
  • इतरोई नाइ, आमी अनुसूचित जाति-जनजाति अउर नक्सल हिंसा प्रभावित क्षेत्र चो पीला मन के अच्छा शिक्षा देतो काजे परयास आवासीय संस्था खोल् लंूसे, जेचो लाभ हर बरख मिरेसे।
  • हालने चे जेईई चो रिजल्ट ईलीसे। ‘परयास’ संस्था चो आमचो 27 पीला मन सफल होलासोत, जेन येबे देश चो बड़े प्रतिष्ठित इंजीनियरिंग शिक्षा संस्थान मन ने पढुआत।
  • रिजल्ट दखुन मोके जुगे हरीक लागली। मै असन भावुक होले, जसन मै खुदे पास होउनगेले।
  • सुकमा जिला चो कोंटा चो चिंतागुफा, करीगुण्डम गांव चो निवासी सोड़ी जोगा चो माय-बाप चो घर नक्सली मन उजडाउन देउन रला। येचो काजे हुन मन के कोंटा चो शिविर ने डेरा पडुक होली। अउर सोडी के ‘प्रयास’ चो सहारा मिरली, हुता हुन चो आपलो लगन अउर प्रतिभा ले साबित करूंन दखालो कि हुन कचो ले कम नुआय। येबे सोड़ी के कोनी ताकत आगे बढ़तोके नी रोकुक सकेदे।
  • राजनांदगांव जिला चो पांडुटोल गॉव चो संदीप मेश्राम चो घर बीता मन तो काय गांव ने कोनी बले आईआईटी चो नाव नी सुनो रला, मांतर संदीप आईआईटी ले इंजीनियर बानुआय।
  • बलरामपुर चो सदाराम किसान परिवार ले आय। येचोय जसन ऋषिचंद्र तिग्गा, करण राठिया, झामलाल, आकाश शिंदे, सोमेश बघेल, आशीष नेताम, रमेश पैकरा, रविन्द्र मौर्य, वासुनंद जसन पीला मन तो सत्त आय आसमान हिटुन दखालासोत।
  • ये पीला गांव ने गरीबी ने अउर कठिन परिस्थिति ने रहुन सपना दखतो बिता पीला मन चो काजे नुवा आईकॉन आसे।
  • आमी बेटी मन के बले बराबरी ले विकास चो अवसर दिलूसे। बेटी मन के आत्मनिर्भर बनातो काजे उच्च शिक्षा सहायक आसे। येचो काजे हुन मन के आमी स्नातक तक चो शिक्षा बिना पैसा देउंसे।
  • छत्तीसगढ़ ने आमचो प्रधानमंत्री श्री नरेन्द्र मोदी चो सपना के पूरा करतो काजे कौशल उन्नयन उपरे जोर दिलूंसे।
  • छत्तीसगढ़ देश चो असन पहिल राज्य आय, जेन ने कौशल विकास चो प्रशिक्षण काजे बकायदा कानून बनालिसे अउर हर जिला ने व्यवस्था करूंक होलीसे।
  • कमले कम पढ़ाई करतो बिता जुवान (लेका-लेकी) मन के बले रोजगार चो अच्छा अवसर उपलब्ध करातो काजे प्रधानमंत्री कौशल विकास योजना चो तहत कौशल उन्नयन चो प्रशिक्षण देतोर होयसे।
  • हर जिले ने जुवान मन आमचो कलेक्टर चो लगे मांग करूंक सकोत कि हुन के जेचो फायदा मिरो, उसनेच प्रशिक्षण चाहतोर आय। ये योजना चो अन्तर्गत लगभग 3 लाख जुवान मन के हुन हुनर सिखातोर होलीसे, जेन ले हुन मन अच्छा रोजगार चो जरिया धरूंक सकोत।ये मामला ने छत्तीसगढ़ चो पहल अउर उपलब्धि मन देश ने रोल मॉडल बन लिसे।
  • आमी देश चो पहिल राज्य आउं, जो जुवान मन चो सहभागिता ले प्रदेश चो युवा नीति (जुवान नीति) बनाउंक जाउंसे। असन नीति आमी जुवान मन चो राय लेई बनाउंसे।
  • मैं चाहंेसे कि नुवा -युवा नीति बनातोर ये अभियान चो काजे हरेक ग्राम सभा ने गहन चर्चा होवो, येचो पूरा प्रक्रिया उपरे लोग मन आपलो राय रखोत अउर सुझाव देवोत।

महिला उद्घोषक द्वारा

  • सुनतो लोग मन! मुख्यमंत्री साहेब जोन युवा-नीति (जुवान नीति) चो तैयारी चो गोठ सांगलासोत हुन चो काजे ग्राम सभा ने चर्चा करलो पाठकुति चो मिरलो सुझाव इंटरनेट चो प्रयोग करूंन http:/youthpolicy.cgstate.gov.in लिंक चो माध्यम ले पठाउक सकासे।

पुरूष उद्घोषक द्वारा

  • डाक्टर साहेब! गांव हो नाहाले शहर चो मासूम लोग मन के ज्यादा लाभ चो लालच देउंन कितलो कंपनी मन हुन चो पैसा हड़पुन देसोत थोडे़ दिन तक ले ये कंपनी मन चो ऑफिस वगेरा दखादेउआत मांतर फेर अचानक सपाय गायब होंउन जाउआत।काय सरकार जनता के ये प्रकार चो धोखादाड़ी ले बचातो काजे काइ व्यवस्था करसोत?

मुख्यमंत्री जी द्वारा

  • हव! आमचो सरकार असन स्थिति ले निपटतो काजे गोटोक कानून बनालासोत, जेचो चलते लोग मन के ठगुन भाति पैसा नेतो बिती संस्था मन चो उपरे कड़ा कारवाइ करतो अउर कठोर डंड देतोचो वैवस्था आसे।
  • ये कानून चो भीतरे प्रत्येक जिला चो कलेक्टर के सूचना नी दिलो कोनी बले कंपनी असन कोनी कारबार नी करूंक सकेदे।
  • मै जनता ले अपील करेंदे कि पैसा जमा करातो चोपुरे अच्छा ले जॉच पडताल करोत जो बले पैसा दुई गुना अउर तीन गुना करतो चो लालच देउक लाय एयसे पहिल हुन चो पूरा पता पूछों अउर हुन चो बारे ने कलेक्टर ऑफिस ने जाउंन भाति पूछों अउर जानो कि हुन मनुक नाहालेक हुन कंपनी के पैसा देतोर अच्छा रहेदे कि नाइ।
  • लोग मन चो पैसा नेउंन फरार होतो बिती कंपनी मन चो उपरे बिरूद्व ने गेलो चार बरख ने 199 एम.आई.आर. दर्ज करूंन 333 लोग मन के गिरफ्तार करलो होलीसे।

महिला उद्घोषक द्वारा

  •  मुख्यमंत्री साहेब, ये महिना ने दुई ठन असन बडे तिहार होली जेचो कारण ने छत्तीसगढ़ ने साम्प्रदायिक मन चो मंजारे आपसी प्रेम अउर मेल जोल चो गोटोक मिसाल (चिना) बनली। आपन येचो बारे ने काय सांगुक चाहासे?

मुख्यमंत्री जी द्वारा
रथ यात्रा/ईद-उल फितर

  • हव, रथ यात्रा अउर ईद-उल फितर दुनोचे बड़े तिहार आत।
  • आमचो भारतीय रीति रीवाज ने पूरी ने बिराजलो भगवान श्री जगन्नाथ प्रभु चो रथ जात्रा चो मान कितलोई कारण ले आसे। असन मांतोर होयसे कि भगवान जगन्नाथ एइ दिन ने जनता चो मंजारे एउआत। अउर हुन मन चो सुख दुःख ने संग होउआत। भगवान सांगसोत-‘सब मनीसा मोर परजा’ मने  सापय लोग मोचो परजा आत।
  • छत्तीसगढ़ ने जसन मेल जोल प्रेम भाव सद्भाव चो रीवाज आसे, हुन चो गोटोक बड़े मिशाल रथ जात्रा अउर ईद-उल फितर चो गोठकी संगे मनातोर आय। मै ईद-उल फितर चो काजे सपाय मुसलमान भाई -बहिन मन के मुबारकबात देयंसे। जोन मन खुबे उत्साह ले एक महिना तक रोजा राखला अउर रमजान महिना चो सरलो काले सपाय लोग सेंवई-खीर खुवाउंन मुह मीठा कराला।
  • मोके बिश्वास आसे कि आमी जमाये मीलूंन छत्तीसगढ़ के आपसी भाईचारा चो बड़े भाई उदाहरण बनाउंन भाति राखुंदे।

डॉ. खूबचन्द बघेल जयंती

  • 19 जुलाई के अलग छत्तीसगढ़ राज्य चो सपना देखतो बीता डॉ. खूबचन्द बघेल जन्म दिन आय।
  • डॉ. बघेल आजादी चो लड़ाई में सेनानी रला अउर आजाद भारत ने राजनीति के बाट दखातो ने बले आपलो बडे़ भारी भागेदारी निभाला।
  • डॉ. बघेल छत्तीसगढ़ ने ऊंच-नीच, छूआछूत जसन गलत नीति मन चो बिरूद्व ने समाज के रूंडाउंन रला अउर अच्छा सोच चो राजनीति चो सूत्रधार रला।
  • मैं डॉ. खूबचन्द बघेल के जोहार करेंसे अउर बिश्वास देयंसे आमी सपाय हुन चो आधा रलो सपना के पूरा करूंदे।
  • डॉ. खूबचन्द बघेल चो गोटोक कविता चो खिंडीक लाईन मन के सांगुक चाहेंसे, जो कि हुन मन छत्तीसगढ़ खान-पान सद्भाव अउर रीति रीवाज ले हुन चो लगाव चो चिन्हा आय-

बासी के गुण कहूं कहां तक, इसे न टालो हांसी में।
गजब बिटामिन भरे हुए हे, छत्तीसगढ़ के बासी में।।

पुरूष उद्घोषक द्वारा

  • सुनतो लोग मन! आपन मन चो प्रतिक्रिया मन के आमी आपन मन चो चिठ्ठी, सोसल मिडिया, फेसबुक, ट्विटर चो संगे एस.एमएस ले बले बड़े संख्या ने मिरसोत। एचो काजे आपन सपाय के खुबे-खुबे धन्यवाद।
  • आगे बले आपन आपलो मोबाईल ले मेसेज बॉक्स ने RKG चो पाठकूती स्पेस नेउंन आपलो बिचार लिखुंन 7668-500-500 नम्बर ले पठाते रहा अउर संदेश चो आखरी ने आपलो नाव अउर पता लिखुंक नी भुलका।
  • मुख्यमंत्री साहेब, आमचो सुनतो लोग मन ले जसन प्रतिक्रिया मन मिरेसे  हुन जमाय चाहसोत कि आपन हुन चो उपरे काइ सांगा?

मुख्यमंत्री जी द्वारा

  • सत्तेचे ये हरीक चो गोठ आय, आमचो जागरूक सुनतो लोग मन खुबे धियान ले येई कार्यक्रम के सुनसोत अउर लगातार बाड़तो संख्या ने आपलो प्रतिक्रिया मन देसोत।
  • गांव खैरबार, जिला सरगुजा चो कक्षा 7वीं ने पढ़तों बिती बेटी अपूर्वा दिक्षित चिठ्ठी खुबे अच्छा आसे। बेटी बस्ता चो बोझ चो बारे ने लिखलीसे कि येचो ले हुन चो कांधा दुखु आय। मै अपूर्वा ले सहमत आसे कि बस्ता चो बोझ के घटातो जरूरत आसे। येचो बारे ने मै शिक्षा विभाग के सांगले से कि जरूरी कारवाइ करोत।
  • ग्राम लोरमी चो संजय जायसवाल, नवागढ़ चो चन्द्रकांत राजपुत, अम्बागढ़-चौकी चो राजेन्द्र दामले, शीतल प्रसाद पाटनकर, बिलासपुर आदि ने प्रसारण चो टाइम 20 मिनट करतो चो स्वागत करलासोत।
  • फेसबुक ने जफर अहमद, सत्यनारायण सिंह राजपुत, आरू अनुराग खण्डेलवाल बले जुवान मन के प्रेरणा देतो चोे गोठ सांगलासोत। मै चाहेंसे आज चो प्रसारण ले हुन मन चो मांग पूरा होउंजायदे।
  • असने यादवेन्द्र प्रताप सिंह, राजेन्द्र त्यागी, हरीश गिदनानी, बीबल निषाद, नारायाण शर्मा, सत्यम केशरवानी, चांदमल मीना, दिनेश नायक असने अउर लोग मन प्रसारण ने इलो सुन्दरता के सहरालासोत।
  • एसएमएस ले बले खूबे संख्या ने प्रतिक्रिया मिरलीसे। के.व्ही. सुब्रमण्यम सड़क सुरक्षा चो उपाय मन चो बारेने जगरूक करतो उपरे जोर दिलासोत, हुताय डॉ. सत्यम ट्रांसफर ले प्रतिबंध बुचा चो मांग करलासोत। एस.आर.यादव बलौदाबाजार बले ये प्रसारण स्कूल चो दिन ने करतो चो मांग करलासोत।
  • मै आपन सपाय चो ह्दय ले अभारी आसे जेकि येई प्रसारण सुन सोत अउर हुन चो पाठकूति अपलो प्रतिक्रिया बले पठासोत। हुन सपाय चो नाव के सांग तोर संभव नी आय, मांतर मोचो लगे सब चो सुझाव आरू जमाय जानकारी अमरेसे। आपन मन के खुबे-खुबे धन्यवाद।

महिला उद्घोषक द्वारा

  • सुनतो लोग मन, येदाय बारी आसे क्विज चो ।

क्विज- 2 चो प्रश्न रली-
21 जून के दुनिया कसन रूप ने मनायेंसे?
एचो सही जवाब आय-
B. विश्व योग दिवस।

  • आमके हरीक आसे कि येई हार दुई गुना संख्या ने लोग मन जवाब पठालासोत, जेचो ले पहिर 5 जवाब पठातो लोग मन चो नाव आय-

1.    देवेन्द्र गुलहरे, बिलासपुर
2.    अजय कुमार वंशे, बकतरा
3.    राकेश बलौदाबाजार
4.    परिधि शर्मा, रायगढ़
5.    मिथलेश शर्मा, थान-खम्हरिया

पुरूष उद्घोषक द्वारा

  • अउर येदाय बेरा आय आज चो मने तीसरा क्विज चो सवाल चो-

सवाल आय-
‘ प्रधानमंत्री फसल बीमा योजना’ काचो काजे आय?
सही जवाब A  नाहले  B ले कोनी गोटोक आय।
A. किसान मन काजे  B. हस्तशिल्पकार मन चो काजे
आपलो जवाब देतो काजे आपलो मोबाईल चो मेसेस बाक्स ने QA लिखा आरू स्पेस देउंन A नाहले B जो बले आपन के सही लगेसे हुन गोटोक अक्षर लिखुंन भाति 7668-500-500 नम्बर ले पठाउंन दिया। संगने आपलो नाव अउर पता जरूर लिखा। ये चो संगे आज चो अंक आमी येताय समाप्त करूंसे, येदाये चो अंक ने 14 अगस्त के आपन मन संगे होयंदे फेर भेंटघाट। तेबे तक काजे दिया आमके इजाजत।

जुहार।




 

Date: 
10 July 2016 - 6pm