Homeरमन के गोठ(रमन चो गोठ) : आकाशवाणी ले प्रसारित बिशेष कार्यक्रम (दिनांक 13 नवम्बर 2016, समय-प्रातः 10.45 से 11.05 बजे)

Secondary links

Search

रमन के गोठ(रमन चो गोठ) : आकाशवाणी ले प्रसारित बिशेष कार्यक्रम (दिनांक 13 नवम्बर 2016, समय-प्रातः 10.45 से 11.05 बजे)

पुरूष उद्घोषक
सुनतो लोग मन के जुहार!

  • आकाशवाणी चो बिशेष प्रसारण ‘‘रमन चो गोठ’’ ने आमी,  जमाय सुनतो लोग मन चो मन ले सुआगत करूंसे, अभिनंदन करूंसे। कार्यक्रम चो  15वीं कड़ी चो काजे आकाशवाणी चो स्टुडियो ने माननीय मुख्यमंत्री डॉ. रमन सिंह साहेब अमरला सोत।
  • डॉक्टर साहेब जुहार, खुबे-खुबे सुआगत आय आपन चो येई कार्यक्रम ने ।

मुख्यमंत्री जी द्वारा हल्बी में

  • धन्यवाद! जमाय संगी-साथी, सियान- जुवान माय-बहिन मन के जय जुहार।
  • छत्तीसगढ़ राज्य बनलो 16 बरख होलीसे। आमी राज्य बनालो बिता (निर्माता) अटल जी चो सपना के पूरा करूंसे। ये दाय राज्योत्सव ने आमचो प्रधानमंत्री माननीय नरेन्द्र मोदी जी अउर आमचो देश चो गृह मंत्री श्री राजनाथ सिंह जी एउन रला। राज्य ने रहतो सपाय लोग मन के बाधाई अउर शुभकामना देउन गेला।
  • एचो ले आमचो उत्साह बाडुंन गेलीसे, आमचो संकल्प मजबूत होउन गेलीसे। नुवा ताकत ईली से, येबे छत्तीसगढ़ के अउर आगे बढ़ातोर आसे। नुवा जोश चो

संग, आमचो छत्तीसगढ़ के देश चो पहली राज चो बना चो काजे जीव- परान ले भिड़लू से।
निरंतर मुख्यमंत्री जी द्वारा: हल्बी में

  • कार्तिक महिना उजाड पाख चो एकादशी के, देवउठनी एकादशी मानलु। ये दिन ने डंाडा चो माण्डो बनाउन तुलसी बुटा चो बिहा करतोर होयसे। चार महिना पुरे देवषयनी एकादशी ले थेब लो शुभ काम ये दिन ले फेर शुरू होउ आय। शादी-बिहा अउर दुसर शुभ काम मन चो काजे देवउठनी एकादशी चो बाट दखतोर होयसे।
  • गुरूनानक जयंती, गुरू पूर्णिमा, पुन्नी मडई, अउर बले तिहार मन  चो बेरा ने मै आपन जमाय केे बाधाई अउर शुभकामना देयेंसे।

महिला उद्घोषक

  • मुख्यमंत्री साहेब, राज्योत्सव चो बेरा ने माननीय प्रधानमंत्री जी साहेब छत्तीसगढ़ के आदरणीय पंडित दीनदयाल उपाध्याय जी चो सपना के पूरा करतो बिता राज्य बलुन सांगला। असन ने राज्य चोे नीति मन अउर योजना मन उपरे काय परभाव पडेदे?

मुख्यमंत्री जी

  • ये बरख पंडित दीनदयाल उपाध्याय साहेब चो जनम शताब्दी बरख चो रूप ने मानुक होयसे। पंडित उपाध्याय साहेब एकात्म मानववाद अउर अंत्योदय चो सिद्वांत ले समाज चो सबले पिछड़ा अउर सबले कमजोर मनुक चो सेवा के मानव धरम अउर सामाजिक जीवना चो उद्देश्य सांगु रला।
  • मोके हरीक लागेसे कि छत्तीसगढ़ ने आमन मन अंत्योदय के राज्य चो सपाय नीति मन अउर योजना मन चो मूल मंत्र बनालूं।
  • अनुसूचित जाति, अनुसूचित जनजाति, पिछड़ा वर्ग, मेहरार मन गाॉव गरीब अउर किसान मन चो जीवना ने उन्ती आंतो काजे आमन मन कितलोई योजना मन बनालू। आमचो जन कल्याणकारी योजना मन राज ने तो खुबे सफल होली अउर संगे-संगे राष्ट्रस्तर ले बले खुबे मन करलासोत।
  • आमके छत्तीसगढ़ चो नुवा राजधानी बनातो चो सौभाग मिरलीसे। येचोई चलते आमन मन ‘‘ नया रायपुर’’ के खाली विश्व चो सबले अच्छा राजधानी शहर चो रूप ने विकसित नी करलु से बल्कि येई विश्व स्तरीय अधोसंरचना ले सजलो बिती शहर के अंत्योदय चो प्रेरणा चो केन्द्र बले बनालु से। येथा कमजोर ढंग चो लोग मन चो रतो बस्तो अउर काम करतो चो जमाय सुविधा मन बराबर रूप ले मिरेदे।
  • आपलो संकल्प चो घोषणा करतो काजे आमन मन ‘‘ नया रायपुर ’’ चो केन्द्रीय सड़क के ‘‘एकात्म पथ’’ चो नाम दिलुसे अउर येई बाट चो मंझारे रलो बिती खुबे बड़े चौराहा चो उपरे पंडित दीनदयाल उपाध्याय साहेब चो पुतला मंडालुसे, जेचो अनावरण माननीय प्रधानमंत्री साहेब करलासोत। असन ने नुवा रायपुर ने  एकात्म पथ, ‘‘ जन पथ के राज पथ ’’ ले जोडतो बिती बाट बनुन गेलीसे, जे कि गोटोक बाटले शासन अउर प्रशासन के गरीब मन चो प्रति संवेदनशील बनाउन संगायेदे, हुताय दुसर बाटे गरीब मन चो मन ने आपलो अधिकार मन चो अलख बले जगाउन राखेदे।



पुरूष उद्घोषक

  • मुख्यमंत्री साहेब, भारत ने बरख-बरख ले चलतो बिती 500 अउर 1000 रूपया चो करंसी नोट के 09 नवम्बर 2016 ले बंद करतो चो फैसला भारत सरकार नीलिसे। जेब चो तेबे परभाव ले मने कि 08 नवम्बर 2016 चो रात 12 बजे ले चे येई फैसला लागू होउन गेलीस। येके आपन मन कसन ढंग ले दखा साहस?

मुख्यमंत्री जी

  • माननीय प्रधान मंत्री नरेन्द्र मोदी साहेब भारत चो अर्थव्यवस्था के मजबूत करतो काजे गोटोक अउर ऐतिहासिक कदम उठालासोत। 500 अउर 1000 रूपया चो नोट के एबचो एबे परभाव ले बंद करतो चो फैसला ले काला धन चो बड़े भारी समस्या चो उपरे अंकुश लगेदे, जाली नोट मन ले निपटतो, भ्रष्टाचार अउर आतंकवाद उपरे नियंत्रण ने बले मद्द मिरेदे। माननीय मोदी साहेब चो येई सर्जिकल स्ट्राइक भारत के आर्थिक मजबूती देयेदे। येचो ले माननीय मोदी साहेब चो दृढ़ इच्छाशक्ति, हुनचो साहसिक अउर दूरदर्शी फैसला चो रूप ने चे दखुक होयदे। नुवा व्यवस्था होलो ने स्वाभाविक रूप ले आगे खिडिक दिन तक ले छोटे-मोटे समस्या मन पूरे येउ आत, जेचो निराकरण काजे बड़े इंतिजाम करूक होलीसे। येई फैसला चो जोरदार स्वागत होतोर चाईये, काय काजे बल्लो ने येचो ने ईमानदार भारत चो छवि अउर नीखरून जायेदे, जेचो लाभ हर स्तर ने मिरेदे।

महिला उद्घोषक

  • मुख्यमंत्री साहेब, राज्योत्सव चो उद्घाटन चो काजे इलो बिता माननीय प्रधानमंत्री साहेब चो हाथ ले ‘‘ सौर सुजला योजना’’ चो शुरूवात बले होली। येई योजना ले काके अउर काय लाभ मिरेदे?
  • छत्तीसगढ़ ने कितलेई असन जगह आसोत जहा सिचाई चो भर पुर साधन नी होलो चो काजे किसान मन के खुबे तकलीप चो सामना करूंक पडेसे। बिजली चो पहंुच आसान नी होलो काजे, याफेर बिजली पहुचातोर खुबे खरचिला होतो कारण ने, येथा चो किसान भाई बिजली ले चलतो बिती सिचाई पम्प मन चो उपयोग नी करूक सकते रला। दुई बरख ने 51 हजार किसान मन के सोलर सिचाई पम्प देतोर होयदे। साढ़े तीन लाख ले साढ़े चार लाख रूपया तक लागत बिती सिचाई पम्प किसान मन के 15 ले 30 हजार रूपया तक ने हुन मन चो पात्रता चो हिसाब ने मिरेदे।
  • सौर ऊर्जा याने कि सूिरज देवता चो शक्ति। सूरिज देवता चो महिमा चो बारे ने आपन मन जमाय लोग जाना साहास। सूरिज बुडूआय तेबे राति होउआय। सूरिज भगवान चो किरपा ले चे अंधियार गुचुआय अउर रोजे बिहान पाउआय। हुन चोये किरपा ले चे मौसम बदलु आत अउर सूरिज चो ताप ले चे धान-पान पाकुआत। येदाय छत्तीसगढ़ ने सूरिज देव चो किरपा ले बेड़ा मन के पानी बले मिरेदे। येचो ले न डीजल उपरे खर्चा होयदे, न तो प्रदूषण होयदे। बिजली चो बिल बले नी येयेदे। ‘‘ सौर सुजला योजना’’ ले अढ़ई लाख एकड़ ने सिचाई होउक लागेदे। सपाय परकार ले ‘‘सौर सुजला योजना’’ गोटोक क्रांतिकारी शुरूआत आय।

पुरूष उद्घोषक

  • माननीय मुख्यमंत्री साहेब, किसान भाई बहिन मन अउर हुन मन चो परिवार चो लोग मन के बरख भर ने सबले जादा जोन गोठ चो इंतिजार रहे से, हुन आय समर्थन मूल्य उपरे                  धान घेनतोर। धान घेनतो ले चे किसान चो घर चो, साल भर चो बजट बनु आय। राज्य सरकार चो घोषणा चो अनुसार ये बरख धान घेनतो 15 नवम्बर ले शुरू होतोर आसे। ये बारे ने काय तैयारी मन करलोर होलीसे? अउर आपन किसान भाई मन के काय सांगुक चाहासाहस?


मुख्यमंत्री जी

  • मोके हरीक लागेसे कि दियारी चो पाटकुती धान घेनतो चो तिहार शुरू होयसे अउर किसान मन चो इंतिजार खतम होयसे।
  • आमन मन धान घेनतोर चो व्यवस्था के सुविधाजनक बनातो काजे किसान मन चो पंजीयन करालु से। आपन मन के ये जानुन भाति खुशी होयदे कि ये बरख 14 लाख 54 हजार किसान मन पंजीयन करालासोत। ये संख्या गेलो बरख चो तुलना ने डेढ़ लाख ले आगर आय। असन परकार ले ये बरख राज चो इतिहास ने सबले जादा किसान मन समर्थन मूल्य ने धान बिकतो काजे आपलो मन बनाला सोत अउर येचो काजे विधिवत पंजीयन करालासोत।
  • ये बरख धान घेनतो केन्द्र मन चो संख्या बले बढ़ाउन भाति 1986 करून देउक होलीसे। येचोई संगे ये साल ले 41 मंडी मन अउर उप मंडी मन ने बले धान घेनतोर होयदे।
  • जुगे ले जुगे पंजीकृत किसान मनचो जनधन खाता मन के आधार कार्ड ले जोडुन देउक होलीसे, जेचो कारण किसान मन के भुगतान सीधा हुनमन चो जनधन खाता ने मिरेदे।
  • ये हार गेलो बरख चो अपेक्षा 60 रूपया प्रति क्विंटल जुगे दर मिरेदे। मोटा धान 147 रूपया अउर पतला धान 1510 रूपया प्रति क्विंटल चो दर ले घेनुक होयदे।
  • समर्थन मूल्य उपरे धान घेनतोर 15 नवम्बर 2016 ले 31 जनवरी 2017 तक चलेदे।
  • प्रत्येक किसान ले 15 क्विंटल प्रति एकड़ चो दर ने धान घेनतोर होयदे।
  • जे धान बिकतो काजे उपार्जन केेन्द्र ने आंतोर होयदे। हुन ने 17 प्रतिशत ले आगर नमी नी होतोर चाहिए। येई राष्ट्रीय स्तर चो निर्धारित माप दण्ड आय।
  • असन ने किसान भाई धान के सुखाउन बिकतो कोज आनदे, तो हुन मन के खुबे सुविधा होयदे।
  • मै धान उपार्जन केन्द्र ने काम करतो बिता मन के, धान उपार्जन ने लागलो अधिकारी मन अउर कर्मचारी मन ले अपील करेसे कि हुन मन किसान भाई मन चो संगे खुबे अच्छा व्यवहार करोत, सम्मान जनक व्यवहार चो संगे-संगे हुन मन चो धान घेनतो चो पूरा व्यवस्था करोत। अन्नदाता मन के सहयोग करोत। उपार्जन केन्द्र मन ने किसान मन के सपाय जरूरी सुविधा मन देवोत। ताकि हुन मन चो काम खुबे अच्छा वातावरण ले पूरा होउक सको अउर हुन मन आपलो धान बिकुन हरीक-हरीक घर के फिरून जावोत।
  • सोसाइटी ले धान चो उठाव चो व्यवस्था बले अच्छा ले करोत ताकि कहांय बले धान जाम होउक नी सको अउर काकेई बले असुविधा चो सामना नी करूक पडो, काय काजे बल्लो ने धान जाम होतो चो पाटकुती येतो बिता किसान मन के इंतिजार करूक पडेदे।
  • मै सांगुक चाहेंसे कि आमी धान घेनतो चो अच्छा व्यवस्था ले खाली आपलो प्रदेश चो किसान मन चो येेयेचे सेवा नी करूसे बल्कि देश चो सेवा बले करूसे काय काजो बल्लो ने येचो ले देश चो सार्वजनिक वितरण प्रणाली चो चाउर मिरू आय। केन्द्रीय पुल के चाउर देतो चो मामला ने छत्तीसगढ़ देश ने तीसरा नम्बर ठान

ने आसे। येई देश चो पी.डी.एस.के चलातो काजे आमचो किसान भाई मन चो खुबे बडे़ योगदान होयसे।

  • एचो अलावा एई उपार्जन केन्द्र मन ने जोन्दरा चो घेनतो बले 15 नवम्बर ले शुरू होयसे, जे 31 मई 2017 तकले चलेदे। जोन्दरा चो काजे समर्थन मूल्य 1365 रूं. प्रति क्विंटल चो दाम रखा गेली से।

महिला उद्घोषक

  • डॉ. साहेब, काली 14 नवम्बर, बाल दिवस आय। एई बेरा ने आमी भारत चो पहिल प्रधानमंत्री पं जवाहर लाल नेहरू के सुरता करू ऑव, संगे चे एइ बेरा ने पिला मन चो एबे चो अउर एतो चो समय चो चिंता बले करूऑव। पिला मन के आपलो मया अउर आर्शिवाद देउऑव। एइ बेरा ने आपन चो मन चो गोठ आरू बिचार के सुनतो काजे (गुलायराज) प्रदेश चो पिला मन बाट दखसोत।

मुख्यमंत्री जी

  • बाल दिवस चो बेरा ने भारत चो पहिल प्रधानमंत्री पं.जवाहर लाल नेहरू के शरधा चो फूल चेगाएंसे।
  • लाड़ला पिला मन के मोचो खूबे-खूबे मया। मोके मालूम आसे एइ कार्यक्रम के परिवार चो संगे पिला मन बले मन लगाउन सुनुआत। कितलोय क्षेत्र ने पिला मन जसन मेहनत अउर लगन ले आपलो प्रतिभा के निखरासोत, उनके दुखुन खुब्बे हरीक लागुआय। जमाय पिला मन के बाल दिवस चो बधई अउर शुभकामना।
  • येबे गेलो दिन मन भीतरे गोटक बढिया खबर एऊ रली, कि एग्नाइट अवार्ड चो काजे प्रदेश चो जेन पिला मन चो चयन होलीसे, उनमन आमचो प्रदेश चो रान डोंगरी भितरी गॉव ले एउआत। एई अवार्ड विज्ञान चो क्षेत्र ने करलो विशेष पहल काजे देतोर होऊआय, जेने देश चो लाख-लाख पिला हिस्सा नेउआत। ये बरख राष्ट्रीय स्तर ने 28 पिला मन चो चयन होलीसे, जेमन ले 3 झन पिला छत्तीसगढ़ चो आत। एइ पिला मन के महामहिम राष्ट्रपति चो हाथ ले इनाम मिरेदे। ये खुबे गरब चो गोठ आय।
  • बस्तर चो नक्सल हिंसा ले प्रभावित ठान मन चो पिला मन चो पढ़ई के जारी राखतो काजे आममन जे पोटा केबिन बनालूॅसे, उन ले गोटक सुकमा जिला चो बुडदी गॉव चो कक्षा छठवीं चो विद्यार्थी रोषन सोरी पोलिंग बूथ ले इलेक्ट्रानिक वोटिंग मशीन (वोट मशीन) ने छपलो लेखा के एकेहार कंट्रोल रूम पठातो चो बारे ने गोटक उपाय (प्रयोग) करलोसे। रोषन चो बाप बिता चाहते रलो कि उनचो बेटा गॉव ने गाय चराउक जाओ मान्तर रोषन चो मन चो पढ़ई चो लालच उनके स्कूल अमरा ऊन दिली। रोषन चो मन ने लोकतंत्र चो सबले बडे़ हथियार मतदान चो सुरक्षा के नेउन सवाल उठली। उनके मतपेटी चो चिंता होली कि एने बंद मतदाता मन चो राय सुरक्षित रूप ले गनती काजे अमरून जाओ। एके मै सुब्बे बडे़ गोठ मानेंसे।
  • बिशेष करून नक्सलवाद प्रभावित गांव गंडा ठान चो गोटक पिला अगर एइ स्तर ने सोचेसे, तेबे एचो मतलब बले खुबे बड़े होऊआय। ये लोकतंत्र चो प्रति विशास चो आपलो ढंग चो गोटक अद्वितीय उदाहरण बले आय। असन प्रयोग चुनाव ने सुधार आरू पारदर्शिता बढ़ातो काजे जरूरी आय। असन क्रांतीकारी सोच के राष्ट्रीय स्तर ने पुरस्कार काजे चुनलो होलीसे। मै सांगुक चाहेंसे कि रोषन सोरी आमचो बस्तर अंचल अउर राज चो सुखकारी येतो समय चो निशानी आय। उन नुवा बिचार चो उजड़ आय, जेचो दम ने एतो दिना चो बाट उजड़ होयदे।
  • दंतेवाड़ा रतो बिती कक्षा सातवीं चो पढ़तो लेकी इंदु मानिकपुरी चो कहनी बले बड़े रूचिकर अउर बाट दखातो बिती आय। इंदु सउच घर (शौचालय) बनातो चो बाद चो बारे ने बिचार करून पकाली।सैप्टिक टैंक भरलो अउर उनचो उछरलो पानी ले होतो बिती प्रदूषण चो बारे ने उन चिंता करली। इंदु सैप्टिक टैंक प्रेषर रिकार्डर चो नमूनाबनाली से, जेचो ले भरलो बिती टैंक चो सफई गैस निकरतो ले होउन जाओ अउर बिष बिती प्रदूषण बले गुचुन जाओ। उनचो सुझाव आय कि सैप्टिक टैंक ने आलू काटून डारून दिलो ने एचो कचरा आपे आप सफा होउन जाएदे। मोचो मानतोर आय कि इंदु चो खोज स्वच्छ भारत (सफा सुथरा भारत) अभियान के येतो दिना (भविष्य) चो बाट दखायेदे।
  • इंदु चो बाप बिता मरनार रमेश मानिकपुरी गोटक सिविल ठेकेदार रला, जे कि आपलो काम करतो ठान ले कुली मन के पैसा बटवारा करतो बेरा नक्सली हिंसा ने शहीद होउरला। इंदु बेटी दंतेवाड़ा जिला चो गीदम अन्तर्गत जावंगा एजुकेशन सीटी ने राज्य शासन बाटले चलतो बिती आस्था विद्या मंदिर ने कक्षा सातवीं ने पढ़ेसे। इंदु चो माय खुबे दिन तक ले केरलापाल आंगनबाडी ने काम करली अउर येबे आस्था गुरूकुल ने बुता करेसे। मोके असन जानुन हरीक लागली कि इंदु बडे़ होउन कलेक्टर बनतोके चाहेंसे।
  •  मैं इंदु चो होसला अउर हुन चो प्रतिभा के सलाम करेंसे। इंदु चो माय श्रीमती कल्याणी मानिकपुरी चो तप के नमन करेंसे।
  • विज्ञान चो सोच आरू खोज करतोर चो काजे येई पीला मन चो जुनुन अद्भूत आय।
  • येई पीला मन जुझतो ने पलला-बाढ़लासोत मान्तर काई करून पकातो चो इच्छा करते आगे बाढ़सोत।
  • येचो पूरे नक्सल हिंसा प्रभावित ठान मन चो 29 झन पीला मन येई बरख, प्रयास संस्था चो शिक्षा-दीक्षा के सार्थक करून दखाला अउर भारत चो प्रतिष्ठित इंजीनियरिंग कॉलेज मन ने भर्ती काजे चुना गेलासोत।
  • कोरबा चो रतो बिता श्रेयांस जायसवाल बैडमिंटन ने सीनियर वर्ग ने भारत चो नम्बर एक चो खेलाडी चो दर्जा हासिल करलोसे। असनेचे



आकर्षि कश्यप अंडर 17 वर्ष वर्ग देश ने अव्वल ठान बनातो चो  श्रेय हुन के जायेसे। ये दुनो के बधई।

  • येबे हामी देखुसे कि छत्तीसगढ़ चो पीला मन न खाली शिक्षा चो क्षेत्र ने, खेल चो क्षेत्र ने बल्कि दुसर क्षेत्र मन ने बले हुन मन आपलो नाव आगे बढ़ालासोत।
  • येबे राष्ट्रीय टी.बी. चैनल चो लाइव शो आमी दखुसे, जेमे आमचो छत्तीसगढ़ चो गोटोक बेटा अउर गोटोक बेटी कमाल करलासोत अउर आखिरी छै नम्बर ने ये अमरतो ने शामिल होलासोत आपन मन जरूर दखलासत होती गोटोक नानी असन लेकी अनन्या चौक से चो आत्मबिश्वास भरलो नाच जोन कि गुलाय देश ने धुम मचालीसे। दुसर पीला रायपुर चो तंग बस्ती चो रतो बिता लक्ष्मण आजी काली गोटोक टी.बी. चैनल चो लाइव सो ने धूम मचालोसे। हुन चो बाप बिता सीताराम रिक्शा चलायेसे। मान्तर परिवार चो तंगी हालत लक्ष्मण चो बाट रोकु नी सकली। लक्ष्मण आपलो लगन अउर मेहनत चो बल उपरे गोटोक ठिकाना हासिल करलो। मोचो शुभकामना लक्ष्मण अउर अनन्या चौक से चो संगे आसे कि हुन बिजेता बनु अउर खेल-कूद आरू अन्य क्षेत्र मन ने छत्तीसगढ़ चो नाव उजागर करोत। आपन बले आपलो वोट देउन हुन मन के पहेला ठान ने अमरातो ने मदद करूक सकासे। आप मन चो बले सहयोग हुन मन के चाईये।
  • बाल दिवस चो बेरा ने प्रदेश चो रतो भाई-बहिन मन ले अपील करेंसे कि पीला मन के हिपाजत ने राखोत।
  • बेटा-बेटी ने फरक नी करोत। सपाय की गोटकी बराबर पढ़ाओत, लिखाओत अउर अच्छा संस्कार देवोत।
  • पीला मन चो अधिकार चो सुरखा काजे दर्जन भर कानून चललीसे।
  • बाल बिहाव रोकतो चो कानून, पीला मन के नी करातो चो कानून, नगंत होतो चो पूरे निदान उपाय चो कानून (प्रसव पूर्व निदान तकनीक कानून) अनिवार्य आरू बिन पैसा चो शिक्षा चो अधिकार कानून जसन अउर बले कितलोय कानून मन चो पालन प्रदेश ने करा जायेसे। मै चाहेंदे कि सपाय लोग मिलून भाति पीला मन चो अधिकार मन चो सुरखा ने बाढ़ुन -चढुन हिस्सा निभावा।
  • आज चो पीला चे काली चो कर्णधार आत। येई काजे येतो दिना चो नीव बरकस करतो काजे, आजी बचपना बचातो उपरे धियान देतोर चाईये। ये जिम्मेदारी गुलाय समाज चो आय।

पुरूष उद्घोषक

  • सुनतो लोग मन ! आपन मन चो प्रतिक्रिया मन आमके आपन चो चिट्ठी, सोशल मिडिया-फेसबुक, ट्विटर चो संगे एस.एम.एस. ले बले जुगे संख्या ने मिरेसे। येचो काजे आपन सपाय के खुबे-खुबे धन्यवाद।
  • आगे बले आपन आपलो मोबाईल चो मेसेज बॉक्स ने RKG चो पाटकूती स्पेस नेउंन आपलो बिचार लिखुंन 7668-500-500 नम्बर ले पठाते रहा अउर संदेश चो आखरी ने आपलो नाव अउर पता लिखुंक नी भुलका।
  • मुख्यमंत्री साहेब, आमचो सुनतो लोग मन ले जसन प्रतिक्रिया मन मिरेसे हुन जमाय चाहसोत कि आपन हुन चो उपरे काइ सांगा?

मुख्यमंत्री जी

  • सुनतो लोग मन, आपन मन चो चिठ्ठी अउर मेसेज पाउंन खुब हरीक लागेसे अउर कितलोई काम चो सुझाव बले मिरसत।
  • तिलदा ब्लाक चो अन्तर्गत गॉव भड़हा ले श्री शंकर साहू शिक्षा चो गुणवत्ता ने सुधारतो काजे कितली सुझाव बेल दिलासत।
  • अंबागढ़ चौकी चो गॉव सिरमुण्डा ले राजेन्द्र, कांति, हेमा अउर सूरज दामले उज्जवला योजना उपरे हरीक जाहिर करलासोत। असने प्रकार चो चरडोंगरी चो जय छत्तीसगढ़ श्रोता संग रेडियों चो माध्यम ले जागरूकता आन्तो चो स्वागत करलासोत।
  • भिलाई ले छगन लाल आरू मीना नांगवशी परम्परागत खेल मन उपरे ज्यादा धियान देतो चो सुझाव दिलासोत।
  • ग्राम कमेली दक्षिण बस्तर ले श्री रवि मरकाम चो कहना आय कि लाइफ लाइन एक्सप्रेस ले खुबे लाभ मिरलीसे ये के किरंदुल ने बले आंतोर चाईये।
  • भाठापारा, चरामा, उत्तर बस्तर चो अन्तर्गत साल्हेटोला स्कूल ने शिक्षक श्री दिनेश वर्मा मोके चिठ्ठी पठाउन सांगलो से कि हुन रमन चो गोठ ले प्रेरित होउन भाति रोजे दिने तीन झन पालक मन के फोन करूआत अउर हुन मन चो पीला मन चो बारे ने गोठ बात करूआत। असने परकार असन ने ये गोटोक नंगत कोशिश आय। खुबे संख्या ने आपन मन चो चिठ्ठी, संदेश, सोशल मिडिया उपरे राय मिरतोर सुखद आय।
  • आपन सपाय चो खुब्बे-खुब्बे धन्यवाद, जय जुहार, जय हिन्द, जय छत्तीसगढ़।

महिला उद्घोषक

  • सुनतो लोग मन, येदाय बारी आय ‘क्विज’ चो।

छै नम्बर क्विज चो सवाल रली-
  ‘नोनी सुरक्षा योजना’ काचो काजे आय?
  जेचो सही उतर आय- A नवजात बेटी

  • सबले झटके जे पांच सुनतो लोग मन सही उतर पठाऊ रला, हुन मन चो नाव आय-

1.    संतोषी सिंह, गॉव पोंडीपाली, जिला कोरबा
2.    अनुराग गुप्ता, अम्बिकापुर, जिला सरगुजा
3.    दुर्गाराम साहू, गॉव चारडोंगरी, जिला कवर्धा
4.    संतु जांगडे, गॉव सम्बलपुर, जिला कांकेर
5.    बाल किशन, गॉव कर्रीचालगली, जिला बलरामपुर
पुरूष उद्घोषक

  • अउर सुनतो लोग मन येबे समया आय सात नम्बर क्विज चो।

जेचो सवाल आय-
सौर सुजला योजना चो अन्तर्गत दिया जातो बिती पम्प कसन चलदे?

  • येचो सही उतर (A) सौर ऊर्जा नहाले

                              (B) डीजल

  • ले कोनी बले गोटोक आय।
  • आपलो उतर देतो काजे आपलो मोबाईल चो मेसेज बाक्स ने QA लिखा अउर स्पेस देउन A नहाले B जो बले नंगत आय, हुन गोटोक आखर लिखुन 7668-500-500 नम्बर ले पठाउन दिया। संग ने आपलो नाव अउर पता जरूर लिखा।
  • आपन सपाय रमन चो गोठ सुनते रहा अउर आपलो प्रतिक्रिया मन के आमके जनाते रहा। येचो संगे आज चो गोठ बात (अंक) आमी येथाय सारूंसे। येतो गोठ बात (अंक) ने 11 दिसम्बर के होंयदे आपन संगे फेर भंेट- घाट। तेबे तक काजे दिया आमके बिदा। नमस्कार।


 

Date: 
13 November 2016 - 8pm