Homeरमन के गोठ(रमन चो गोठ) : आकाशवाणी ले प्रसारित होतो बिती बिशेष कार्यक्रम (दिनांक 09 अक्टूबर 2016, समय-प्रातः 10.45 से 11.05 बजे)

Secondary links

Search

रमन के गोठ(रमन चो गोठ) : आकाशवाणी ले प्रसारित होतो बिती बिशेष कार्यक्रम (दिनांक 09 अक्टूबर 2016, समय-प्रातः 10.45 से 11.05 बजे)

पुरूष उद्घोषक
सुनतो लोग मन के जुहार!

  • आकाशवाणी चो बिशेष प्रसारण ‘‘रमन चो गोठ’’ ने आमी  जमाय सुनतो लोग मन चो हार्दिक स्वागत करूंसे, कार्यक्रम चो  14वीं कड़ी चो काजे आकाशवाणी चो स्टुडियो ने माननीय मुख्यमंत्री डॉ. रमन सिंह साहेब अमरला सोत।
  • डॉक्टर साहेब जुहार, आपन चो स्वागत आसे ।

मुख्यमंत्री जी द्वारा हल्बी में
 

  • जुहार! जमाय संगी-साथी, सियान- जुवान माय-बहिन मन के जय जुहार।
  • गुलाये बाटे नवरात्र चो धुमधाम चलेसे। जगा-जगा ने देवी माई चो पूजा पाठ होयसे। जगार मंडालासोत। जोत जलालासोत। जस गीत, सेवा गीत, जगार गीत गूंजे से। आपन सपाय मन के खुबे-खुबे बधई।
  • पुरूष उद्घोषक
  • मुख्यमंत्री साहेब आपन खुबे दिनले सांगासाहस कि छत्तीसगढ़ के देवी माता चो बिशेष आर्शिवाद मिरलीसे। छत्तीसगढ़ ने आदि शक्ति चो पूजा अउर सम्मान चो परम्परा चलेसेे। किरपा करून येचो बारे ने काई बले सांगुक चाहासे ?

मुख्यमंत्री जी
 

  • छत्तीसगढ़ ने देवी माय चो भिने-भिने स्वरूप चो शक्ति पीठ अउर साधना करतो ठान आसे, जोन थाने लोग मन चो खुबे बिशास  आसे।
  • दंतेवाड़ा ने दंतेश्वरी माई, नारायणपुर ने मावली माता, कांकेर ने कंाकलीन माई, डोंगरगढ़ ने मां बम्लेश्वरी, रतनपुर, रायपुर अउर अंबिकापुर ने महामाया, चन्द्रपुर ने चन्द्रहासिनी, मल्हार ने मां डिडनेश्वरी, राजनांदगांव ने शीतला माता अउर पाताल भैरवी, बालोद ने सियादेवी, गरियाबंद ने मां जतमई, गंगरेल ने अंगारमोती, सोनपुर ने मां ज्वाला, धमतरी ने बिलेई माता, चैतुरगढ़ ने महिसासुर मर्दिनी, अड़भार ने मां अष्टभुजी, महासमुंद ने खल्लारी दाई, झलमला ने गंगामाई, कवर्धा ने विंध्यवासिनी, भोरमदेव ने दुर्गा माई, बागबाहरा अउर अभनपुर ने चण्डी दाई बिराजलासोत। सबे गांव, सबे शहर ने कोनी नाहले कोनी रूप ने देवी मां बसलीसे। जे थाने रोजे पूजा होयसे, जे थाने नवरात्र ने मंड़ाई होयसे। मैं ये जमाय शक्तिपीठ अउर साधना ठान मन के कोटी जुहार करेंसे।
  • हजार- हजार भकत मन खुबे-खुबे दूरले पायने रेंगुन यात्रा करूंन मंदिर मन ने अमरसोत।
  • ये मन चो काजे बाट भर जनता चो सहयोग ले खाना-पीना, दवाई-पानी अउर आराम करतो चो ठान चो बेवस्था करलोर होयसे, जेन ले आपसी माया अउर सद्भावना बाढूआय अउर येचो ले गोटोक पंथ, कई काज होयसे।
  • असन पुन चो काम करतो लोग मन चो अउर समिति मन चो मय सराहना करेंसे।


महिला उद्घोषक

  • डॉक्टर साहेब ये मंजाने 11 अक्टूबर के अंतरराष्ट्रीय बालिका दिवस बले आय। मातृ शक्ति चो सम्मान, सशक्तीकरण अउर स्वावलम्बन चो कड़ी प्रदेश ने कसन जुडु आय अउर येचो काजे काय उपाय करतोर होयसे ?

मुख्यमंत्री जी

  • आमन मन परम्परा मन के अउर नुवा उपाय मन के मिलालुसे।
  • अन्तरराष्ट्रीय बालिका दिवस बेरा ने सपाय बेटी मन के बधाई।
  • छत्तीसगढ़ ने मेहरार मन चो खुबे संख्या, हुन मन चो अच्छा हालत चो बले चिना आय। मेहरार अउर मनुक जनसंख्या चो औसत राष्ट्रीय अनुपात ले आमी खुबे आगे आसु। आमचो येथा प्रत्येक एक हजार पुरूष चो तुलना ने 991 मेहरार आसोत। आमचो 27 ने 13 जिला ने तो मेहरार मन चो संख्या मनुक मन चो संख्या ले बले आगर आसे।
  • ये राज्य ने लेकी मन चो जनम ले मिरतो बिती सम्मान, मेहरार मन चो प्रति बराबरी चो भाव, हुन मन चो सुविधा मन अउर अधिकार मन चो प्रति जागरूकता चो बले चिना आय।
  • नवरात्र ने लेकी मन चो भोज चो चलन आसे मांतर आमन मन येके अउर आगे बढ़ाउन कुपोषण मुक्ति अउर पोषण सुरक्षा तक ले अमराउंन दिलुसे।
  • माननीय प्रधानमंत्री मोदी साहेब बले ‘‘बेटी बचाओं बेेटी पढ़ाओं’’ अभियान के शुरू करलासोत, जेके आमन मन जन आंदोलन बनाउंसे।
  • लेकी जनम चो सुरक्षा देतो काजे छत्तीसगढ़ सरकार बले ‘‘नोनी सुरक्षा योजना’’ शुरू करलीसे, जेके धरून बी.पी.एल. परिवार मन चो नुवा जनम लो बेटी मन चो नाव ने बैंक खाता ने रूपया जमा करतोर होयसे, जे रूपया बेटी मन चो बढ़े होलो ने लखपती बनाउंन देयदे।
  • पहेली कक्षा ले धरूंन कालेज तक चो पढ़ाई बिन पैसा चो पढ़ातोर चो बेवस्था करूक होलीसे।
  • रोजगार अउर आपलो उपरे निर्भर होतोर (स्वावलम्बन) काजे बले आमन मन खुबे-खुबे इंतजाम करलुसे। सस्ता करजा, राशन दुकान, आंगनबाडी, कुपोषण मुक्ति, गणवेश जसन योजना मन ने महिला स्व सहायता समूह मन के जोड़लोर होलीसे।
  • पंचायत अउर नगरीय निकाय मन चो चुनाव ने आरक्षण, घर चो पंजीयन फिस ने डील, राशन कार्ड, उज्जवला योजना ने मेहरार मन चो नाव संगातोर जसन पहल ले बहिन मन चो मान-सम्मान आरू अधिकार बाढ़लीसे।
  • गेलो हार मय मानव तस्करी रोकतो काजे उपाय मन चो बारे ने बिस्तार ले सांगुनरले। ये हार मेहरार सुरक्षा चो अउर बले नुवा उपाय मन चो बारे ने सांगतो के चाहेंसे। हर जिला ने ‘‘टोलफ्री महिला हेल्पलाइन-1091’’ शुरू करलोर होलीसे, जेचो चलते कोनी बले बिपती चो बेरा ने कोनी बले बहिन बेधड़क फोन लगाउंन आपलो शिकाएत दर्ज कराउ सकेदे, जेचो ले झटके ले झटके मदद मिरूक सको।
  • हर जिला मुख्यालय ने घरेलू हिंसा अउर परिवार चो झगडा चो रोकधाम काजे पुलिस अधीक्षक (एस.पी.) चो देख रेख ने (महिला परामर्श केन्द्र) चो स्थापना करलोर होलीसे।
  • सात जिला ने ‘महिला विरूद्व अपराध अनुसंधान इकाई’ चो स्थापना करूक होलीसे।
  • असने मेहरार मन के सामाजिक, आर्थिक, कानूनी, सपाय तरह चो संरक्षण देतोर होयसे, ताकि हुन मन आपलो पसंद, रूची, चो काम करतो काजे पूरे एओत अउर खुदचो अउर परिवार चो जीवन स्तर के उपरे उठाउक सकोत।
  • खुबे असन मेहरार मन आपलो गांव पारा ने खुबे जस कमालासोत मांतर असन मेहरार मन चो संख्सा बले खुबे आसे, जो कि गुमनाम रहुंन भाति बले बडे़-बडे़ काम के करसोत।
  • असने चे गोटोक मेहरार आसे बीजापुर जिला चो भोपालपटनम ब्लाक चो सकनापल्ली असपताल ने काम करेसे चन्द्रकांता नीलम। येई मेहरार नौकरी ने काम चो घंटा के गिनती नी करूंन भाति दिन रात गोटोकी करूंन 11 गांव ने असपताल ने जचकी (नंगत करातोर) चो काम के बढ़ावा देली। मितानीन अउर आंगनबाडी कार्यकर्ता चो संग धरूंन गोटोक दल बनाली। पेटहारी मेहरार मन चो जमाय जानकारी धरली, येचो काम ले दूई साल ने टीकाकरण अउर संस्थाप्रसव (असपताल ने नंगत करातोर) 25 ले बढ़ुन भाति शत-प्रतिशत होउन गेलीसे।

पुरूष उद्घोषक

  • मुख्यमंत्री साहेब, परन दिन बिजया दशमी आय। कुट कपट अउर अड़रा काम चो चिना रावण चो बध, राम भगवान चो हाते करतो चो हरीक ने येई तिहार के मनातोर होयसे। आज चो हिसाब ने येचो काय मान आसे।

मुख्यमंत्री जी

  • आपन मन सपाय के बिजया दशमी परब चो खुबे-खुबे बधई।
  • येई तिहार भारतीय संस्कृति ने खुबे मान राखेसे, जसन कि रावण चो दस ठन मुड़ी, दस परकार चो अड़रा काम चो चिना रली, उसने समाज ने काई नहाले काई कमी रउंन जाउआय, जे के सुधार तोर जरूरी होउ आय।
  • मय चाहेंसे कि शिक्षा, स्वास्थ्य, स्वच्छता, कौशल, अधोसंरचना विकास, वैज्ञानिक चेतना, सेवा, संस्कृति, रोजगार, अद्यमिता, जसन कोनी दस लक्ष्य मन के निर्धारण करू अउर समयबद्व कार्ययोजना बनाउंन नुवा तरीका ले उपरे उठतो ने सफलता हासिल करू।
  • असन तो देश अउर परदेश ने रावण दहन चो चलन आसे मांतर बस्तर दशराहा ने रावण दहन नी करूआत। येचोये संगे चे बस्तर दशराहा चो पहचान, दुनिया ने सबले लाम्ब बेरा, मने 75 दिन तक ले मानातो बिती परब चो रूप ने आसे। मां दंतेशरी चो खुबे सुन्दर अउर बडे़ रथ के हजार-हजार आदिवासी भाई मन मिलुन भाति झिकुआत। येई परब ने लाख-लाख देशी अउर बिदेशी दखतो लोग मन शामिल होउआत।

महिला उद्घोषक

  • डॉक्टर साहेब, तिहार मन चो लाइन ने 19 अक्टूबर के करवाचौथ बले आय। येई दिन मेहरार मन आपलो मुनिश चो खुबे लाम्ब जीवना मांगतो काजे उपास राखुआत।  ये बेरा ने आपन काय संदेश देउक चाहासे।
  • मुख्यमंत्री जी
  • सपाय बहिन मन के करवाचौथ चो बधई आरू शुभकामना देंयेंसे तिहार मन चो आज चो जरूरत मन अउर परिस्थिति मन ले जोडुन दखतोर अच्छा आय।
  • मेहरार मन जेबे आपलो मुनिश चो लाम्ब जीवना चो काजे इतलो तियाग करसोत, उपास करसोत, भगवान ले बिनती करसोत तो मनुक मन चो बले करतब होंयेसे कि हुन मन बले मेहरार मन चो भावना संगे जुडोत।
  • नारी सम्मान चो रक्षा काजे सबले जरूरी आय, आपलो घर ने शौचालय चो होतोर अउर येचो उपयोग करतो आदत पाडतो। मने मय चाहेंसे कि हर घर ने शौचालय बनातो चो पहल मनुक मन खुदे करोत।
  • जोन मेहरार मन शौचालय बनातोर अउर सफा रतो आदत मन काजे गांव गंाव ने आंदोलन करलासोत हुन मन के मय साधुवाद देंयेंसे।
  • मनुक मन के जानतोर आय कि हुन मन दुई चका गांड़ी चलातो पहार हेलमेंट पिधोत। नशा नी करोत। बीड़ी- सिकरेट न पीयोत। धुंगिया -गुटका नी खाओत।
  • असने चे आपन मन सही ने नारी शक्ति चो सम्मान करूक सकासे।

पुरूष उद्घोषक

  • मुख्यमंत्री साहेब आपन हर तिहार के नुवा विषय ले जुडुन हुन चो मान के दुगुना करूंन दिलासाहास। ये महिना चो आखिरी ने  पूजा, सुख- समृद्वि चो तिहार दियारी येएदे। असन बेरा चो उपरे काय संदेश देउक चाहासे ?

मुख्यमंत्री जी
धनतेरस

  • दियारी चो पहिल धनतेरस, भगवान धवंन्तरी चो पूजा-अर्चना परब आय। धवंन्तरी के नंगत देंह के देतो बिता मानसोत। योग, आयुर्वेद, प्राकृतिक चिकित्सा असने अउर आमचो असने भारतीय पद्वतीय मन आसे जे के येदाय दुनिया अपनायेंसें
  • मय चाहेंसे कि भगवान धंवन्तरी चो आर्शिवाद ले आमी ‘‘ स्वस्थ्य छत्तीसगढ़’’ बनातो ने सफल होउॅं।
  • आमन मन जहॉं योग अउर आयुर्वेद के बढ़ावा देउसे हुताए आधुनिक स्वास्थ्य सुविधा मन चो काजे बले खुबे महत्वपूर्ण योजना मन के चलाउसे।
  • मय खण्डिक दिन चो आगे कांकेर जाउ रले। हुता स्वास्थ्य चो खुबे असन योजना मन के मिलाउन भाति जसन पहल करलासोत, हुन के दखुन भाति खुबे अच्छा लागली। आमचो योजना मन ले हुन पीला मन चो मुख मंडल ने जसन तेज अउर हसी-खुशी इलीसे हुन मोचो मन ने बसुन गेलीसे।
  • कांकेर चो येई पहल चो मय येथा सांगुक -समझाउक चाहेंसे। ‘‘चिरायु योजना’’ चो भीतरे आंगनवाड़ी ले धरूंन 12वीं कक्षा तक पढ़तो बिता पीला मन चो देह चो जॉच कराउक होली।
  • लगभग 16 हजार पीला मन चो उपचार कराउक होली अउर 412 पीला मन चो चयन ऑपरेशन काजे करूक होली। येबे तक 101 पीला मन चो ऑपरेशन कराउंन दिला गेलीसे, जेने ह्दय रोग चो सबले जादा 38 ऑपरेशन होलीसे। येके छांडुन मोतियाबिंद (आईख बेमार) श्रवण बाधा (कान चो बेमार) संगे 13 परकार चो ऑपरेशन करूक होली। बाचलो 300 ले आगर पीला मन चो ऑपरेशन येतो 08 महिना ने करातो चो लक्ष्य राखलोर आसे।
  • मय दूसर जिला मन ले बले उम्मीद राखे से कि हुन मन अच्छा देह (स्वास्थ्य) ले जुड़लोर योजना मन चो आगर ले आगर लाभ जनता के देवोत। पीला मन चो उपचार जितलो झटके होउक सके उतलो झटके हुन मन देह अउर मन ले स्वस्थ्य होउंन जाउआत। असन ने हुन मन चो चाल-ढ़ाल (परफॉरमेंस) नंगत होउआय।

दीपावली

  • दियारी चो तिहार भगवान राम चो अयोध्या फिरून येतो चो खुशी ने मनातोर होंउसे। येई दिने धन अउर धन बाढ़ती चोे देवी लक्ष्मी आया चो पूजा होउआय। आमचो येथा धन बाढ़ती चो संगे सफई केे जोड़तो चो चलन रलीसे। येचोई काजे दियारी ले पहिल घर, दुकान, ऑफिस मन, कारखाना मन अउर असने जागा मन चो साफ-सफई, लिपई-पोतई चो करतोर होंयसे।
  • येचो बावजूद बले सार्वजनिक आरू कितलेई ठान मन चो सफई चो तरीका (अधोसंरचना) अउर जानकारी (चेतना) चो कमी रहुंन गेली। येई कमी के प्रधानमंत्री श्री नरेन्द्र मोदी साहेब महसूस करला अउर साफ-सफई चो जरूरत के सांगला, जेचो कारण ने येबे गुलाय देश ने साफ-सफई चो क्रांति येएसे।
  • रायपुर ने जुवान मन चो गोटोक दल आसे, जोन मन आपलो नाव ‘बंच ऑफ फूल्ज’ राखलासोत। ये लोग मन शहर चो सार्वजनिक जागा मन चो साफ-सफई करूआत अउर साफ करलो जागा मन के पेंटिंगअसन काम मन करून इतो सुन्दर बनाउंन देउआत कि फेर कोनी हुन जागा के गिनगिना करतो चो कोशिश बले नी करूक सकेदे। येई दल पूरा-पूरा आपलो इच्छा अउर शौक ले आपलो चे खर्चा ने असन अभियान के चलायेसे। मय ये काम के खाली सहरायेसेचे नई बल्कि दूसर लोग मन के बले करतोर आय असन मानेसे।
  • हाल ने गांधी जयंती चो मौकाने येई दल गोटोक बडे़ अभियान के चलाउ रली, जोन ने कितलोई नागरीक मन अउर बड़े-बडे़ अधिकारी मन बले हिस्सा नेउरला। सोचुन दखा कि असनेचे काम, आमचो दुसर गांव मन अउर शहर मन ने रतो बिता जुवान संगवारी मन बले करलो ने प्रदेश ने कितलो नंगत वातावरण बनुंन जायेदे।
  • येदाय दियारी के आमन मन के साफ-सफई चो मौका चो रूप ने दखतोर चाईये। कोल्हार, लेहरा, पानी असने सपाय परकार चो प्रदूषण के थमातो ने मद्दगार होउक सको। फटाका कम ले कम फुटाहा। सजा तो काजे आपलो गांव पारा चो कुम्हार भाई-बहिन मन चो हाथ चो बनालोर दिया जरावा, बिदेश चो झालर मन अउर दुसर जीनीस मन चो उपयोग नी करा। असने आमी ‘मेक इन इंडिया -स्टार्ट अप इंइिया’ के सफल बनातो ने बले भागीदार बनुक सकवां।
  • असन कोशिश मन ले आमी देश अउर प्रदेश चो अर्थव्यवस्था के मजबूत करतो ने आपलो भागीदारी देउक सकवां।

महिला उद्घोषक

  • डॉक्टर साहेब, ये बरख 5 दिन चो राज्य उत्सव मातोचो निर्णय नियागेलीसे। राज्य स्थापना चो 16 बरख पूरा होंयसे। ये उत्सव बले येबे छत्तीसगढ़ चो चलन ने जुडुन गेलीसे।

मुख्यमंत्री जी

  • छत्तीसगढ़ राज्य चो गठन 01 नवम्बर सन 2000 के होउ रली, गेलो प्रधानमंत्री, भारत रत्न, अटल बिहारी वाजपेयी साहेब आमके राज्य चो भेंट देउ रला।
  • हर बरख ये दिन जसन-जसन लगे अमरू आय, उसन -उसन जन-जन ने उत्साह, हरीक अउर खुशीयाली चो लहर उठुक लागु आय। गोटोक अद्भुत चेतना ले छत्तीसगढ़वासी मन चो मन हरीक ले भरूंन उठुआय।
  • ये बेरा ने मन हुआय, कि गेलो बरख ने लिखलो विकास चो कहानी चो पन्ना उलटाउन भाति दखु। राज चो येतो विकास चो संभावना मन के समझु, नुवा लक्ष्य मन के तय करू, नुवा संकल्प धरू अउर फेर काई नुवा कीर्तिमान के रचतो काजे आगे बाढ़ंू।
  • राज ने जसन विकास चो वातावरण बनलीसे हंुनचोयेे नतीजा आय कि गांव -गांव ने लोग आपलो समस्या चो समाधान निकराउंक सकसोत। मय आजी हुन गांव कारी मन चो खुला मन ले परसंसा करूक चाहेंसे। गोटोक ताजा उदाहरण राजनांदगांव अउर दुर्ग जिला चो शरहद चो गांव तुमडीकसा चो आय।
  • गांव चो 100 किसान परिवार, सूखा चो मार के झेलते रहोत। उत्साही जुबा विजय साहू, अशोक रावटे, डामन लाल मसिया अउर हुन चो संगवारी मन बंधिया तलाब चो पानी चो दिशा बदलतो चो फैसला करला काय काजे बल्लोंने हुन के मतिया मोति निकास मार्ग ले जोडतोर होउक सको। गांव बिता मन आपस ने चंदा करला, श्रमदान करला अउर 700 मीटर लाम्ब नाली बनाउंन 500 एक्कड़ बेड़ा मन के हरियर करून दिला। गोटोक हिम्मत गोटोक गांव के खुशहाल बनाउन दिली।
  • मय चाहेंदे कि असने अउर बले सफलता चो कहानी मन आपन मन मोके पठावा। येचो ले पता चलेसे कि राज चो विकास चो काजे लोग कसन परकार जीव-जान ले जुटलासोत। येई काजे तिहार मन चो सूची ने राज्य उत्सव खुबे स्वाभाविक रूप ले जुडुन जाउआय। जेचो किरता आमके नुवा संकल्प अउर ताकत (ऊर्जा) ले काम करतो चो मौका मिरूआय।

साम्प्रदायिक सद्भाव के बारे में

  • आजी मय आपन मन ले येई अपील करूक चाहेंसे कि साम्प्रदायिक सद्भाव, समरसता, भाई चारा चो वातावरण ले प्रदेश चो बिशेष पहचान बनलीसे, जेके बनाउंन रखतोर आमी सपाय चो जिम्मेदारी आय। येई वातावरण चे राज ने विकास चो तेज गति बनाउंन राखतो ने साहा होयदे। येई काजे कोनी बले परकार चो अफवाह मन उपरे धियान नी दिया। सब चो धार्मिक भावना मन अउर बिसास मन चो सम्मान करा। शांति बेवस्था बनाउंन राखतों ने प्रशासन के साथ दिया

महिला उद्घोषक द्वारा

  • सुनतो लोग मन ! आपन मन चो प्रतिक्रिया मन आमके आपन चो चिट्ठी, सोशल मिडिया-फेसबुक, ट्विटर चो संग एस.एम.एस. ले बले जुगे संख्या ने मिरेसे। येचो काजे आपन सपाय के खुबे-खुबे धन्यवाद।
  • आगे बले आपन आपलो मोबाईल चो मेसेज बॉक्स ने त्ज्ञळ चो पाटकूती स्पेस नेउंन आपलो बिचार लिखुंन 7668-500-500 नम्बर ले पठाते रहा अउर संदेश चो आखरी ने आपलो नाव अउर पता लिखुंक नी भुलका।
  • मुख्यमंत्री साहेब, आमचो सुनतो लोग मन ले जसन प्रतिक्रिया मन मिरेसे हुन जमाय चाहसोत कि आपन हुन चो उपरे काइ सांगा?

मुख्यमंत्री जी

  • खुबे संख्या ने आपन मन चो चिठ्ठी, संदेश, सोशल मिडिया ले राय मिरतोर सुखद आय।
  • पिथौरा चो श्रीमती तिरिथ बाई तारक मोके चिठ्ठी पाठउन सांगली कि हुन चो मुनिश दिब्यांग आय। हुन पेटाहारी आसे। स्मार्ट कार्ड बले नी बनाउंक सकलीसे अउर उज्जवला योजना चो भीतरे रसोई गैस कनेक्शन चाहसोत।
  • मय महासमुन्द कलेक्टर के निर्देश दी ले कि श्रीमती तिरिथ बाई चो समस्या चो समाधान झटके करा जाव। रमन चो गोठ सुनुन भाति तिरिथ बाई मोके चिठ्ठी लिखुन रली, येई काजे मय येई कार्यक्रम चो माध्यम ले सांगुक चाहेंसे कि तिरिथ बाई के स्मार्ट कार्ड अउर उज्जवला योजना चो भीतरे रसोई गैस चो कनेक्शन देउंन दिलो गेलीसे। येबे तिरिथ बाई के दारू, जराउक नी पडे़ दे। हुन चो परिवार चो ईलाज बले स्मार्ट कार्ड चो माध्यम ले होयदे।
  • एस.डी.खान संगे कितले लोग मन उज्जवला योजना चो प्रशंसा करते करते सांगलासोत कि येचो ले बहिन मन के धुआ ले निजात मिरेसे।
  • भुवन नेगी संगे खुबे असन श्रोता मन बेटी मन के बचातो चो पहल चो स्वागत करला अउर चिटफंड कम्पनी मन चो बिरूद्व ने कड़ा कार्यवाही चो मांग करलासोत।
  • धमतरी ले प्रकाश लखवानी सुझाव दिलासोत कि प्रदेश चो सपाय जिला मन ने हरित क्रांति आना।
  • ग्राम पाहंदा, जिला कोरबा निवासी खम्मेलाल कुर्रे सांगलासत कि पंचायत मन ने शिविर लागाउंन स्कूली पीला मन चो काजे जाति, निवास अउर आय प्रमाण पत्र येदाय आसानी ले बनेसे।
  • किरंदुल निवासी अरसूराम मरकाम दंतेवाड़ा जिला ने लाइफ- लाइन एक्सप्रेस चो स्वागत करलासोत।
  • श्री उमेद कुमार निषाद, जंयती राम गोपाल ध्रुव, छगन लाल नागवंशी अउर बले लोग कार्यक्रम के ज्ञानवर्धक अउर उपयोगी सांगलासोत।
  • आपन जमाय के खुबे-खुबे धन्यवाद, जय जुहार, जय हिन्द, जय छत्तीसगढ़।

पुरूष उद्घोषक

  • सुनतो लोग मन, येदाय बारी आय ‘ क्विज’ चो।
  •   पांचवा ‘क्विज चो सवाल रली-
  • उज्जवला योजना चो भीतरे काय दिया जायेंसे ?

येचो सही जवाब आय- B रसोई गैस
 

  • सबले झटके जोन पांच सुनतो लोग मन सहा जवाब पठाला हुन मन चो नाव आय-

01.    दुर्गा राम साहू, चारडोंगरी कबीरधाम
02.    हरमिंदर चावला, भाटापारा
03.      जीवन लाल रजक, लच्छापुर जिला बलौदाबाजार- भाटापारा
04.      मोहन सिंह राज, कोरबी, जिला बिलासपुर
05.      भारती साहू, पोंडी-पाली जिला कोरबा

 

महिला उद्घोषक द्वारा

  • अउर येबे बेरा आय आजी चो मने छठवें नम्बर क्विज चो
  • सवाल आय- ‘‘नोनी सुरक्षा योजना काचो काजे आय ?
  • सही जवाब- A नवजात बेटी  B नवजात बेटा
  • आपलो जवाब देतो काजे आपलो मोबाईल चो मेसेस बाक्स     
  • ने फ। लिखा आरू स्पेस देउंन । नाहले ठ जो बले आपन के सही लगेसे, हुन गोटोक अक्षर लिखुंन भाति 7668-500-500 नम्बर ले पठाउंन दिया। संगने आपलो नाव अउर पता जरूर लिखा।
  • आपन सपाय ‘रमन चो गोठ’ सुनते रहा अउर आपलो प्रतिक्रिया ले आमके जनाते रूआ। अउर येचो संगे आज चो अंक आमी येताय समाप्त करूंसे, आगे चो अंक ने 13 नवम्बर के आपन मन संगे होयंदे फेर भेंटघाट। तेबे तक काजे दिया आमके इजाजत। जुहार।




 

Date: 
9 October 2016 - 9pm