Homeरमन के गोठ(रमन चो गोठ) : आकाशवाणी ले प्रसारित होतो बिती बिशेष कार्यक्रम (दिनांक 11 दिसम्बर 2016, समय-रात्रि: 08 : 00 से 08.20 बजे)

Secondary links

Search

रमन के गोठ(रमन चो गोठ) : आकाशवाणी ले प्रसारित होतो बिती बिशेष कार्यक्रम (दिनांक 11 दिसम्बर 2016, समय-रात्रि: 08 : 00 से 08.20 बजे)

पुरूष उद्घोषक

सुनतो लोग मन के जुहार!

  • आकाशवाणी चो बिशेष प्रसारण ‘‘रमन चो गोठ’’ ने आमी,  जमाय सुनतो लोग मन चो मन ले सुआगत करूंसे, अभिनंदन करूंसे। कार्यक्रम चो 16वीं कड़ी चो काजे आकाशवाणी चो स्टुडियो ने माननीय मुख्यमंत्री डॉ. रमन सिंह साहेब अमरला सोत।
  • डॉक्टर साहेब जुहार, खुबे-खुबे सुआगत आय आपन चो येई कार्यक्रम ने ।

मुख्यमंत्री जी द्वारा हल्बी में

  • धन्यवाद! आपन चो बले आरू आपलो रेडियो अउर टी.बी. सेट चो पूरे बसुन भाति मोके सुनतो लोग मन चो बले।
  • जमाया संगी जहुरीया, सियान-जुवान, आया-बहिन मन के जय जुहार।

महिला उदघोषक

  • मुख्यमंत्री साहेब, आपन चो सरकार चो तीसर हार चो कार्यकाल चो तीन बरख काली पूरा होयसे। येचो काजे आपन के खुबे-खुबे बधई। आपलो दल ने सबले लम्बा कार्यकाल पूरा करतो बिता आपन अब्बल मुख्यमंत्री होउन गेला साहस। देश ने सबले लम्बा समया तक ले मुख्यमंत्री रतो बिता 10 राजनेता मन ने बले आपन शामिल होउन गेला साहस। आपन चो कार्यकाल कितलेई उपलब्धि मन ले भरली से। येई समया ने बिशेष रूप ले आपन के खुबे बधई अउर शुभकामनामन।

मुख्यमंत्री जी

  • मैं येई कार्यक्रम चो माध्यम ले प्रदेश चो जनता के धन्यवाद देंयसे, काय काजे बल्लो ने मैं जो बले करलेसे हुन चो पाटकुती छत्तीसगढ़वासिन्दा मन चो मया, संग, समर्थन, आशीर्वाद अउर मार्गदर्शन रली।
  • मोचो सौभाग आय कि आमचो राष्ट्रीय नेतृत्व चो हमेशा मोचो उपरे बिश्वास करला अउर असन लायक समझला कि मैं छत्तीसगढ़ चो जनता चो सेवा करूक सकें। येचो काजे मैं आपलो सपाय नेता मन चो, मार्गदर्शक मन चो अउर बाट दखातो लोग मन चो बले शुक्रिया अदा करेंसे।
  • आजी जेबे मैं तेरा बरख पाटकुती पलटून दखेसे तो मोके लागेसे कि छत्तीसगढ़ जोन योजना मन चो क्रियान्वयन करली हुन देश चो काजे बले अनुकरणीय रली। अउर ये सपाय असन काजे होली कि आपन मन मोके आर्शिवाद दिलास, अउर असन लायक बनालास कि मैं बड़े निर्णय नेउक सकें। अउर बड़े निर्णय नेतो चो संगे-संगे क्रियान्वयन चो ताकत बले आपन मोके दिलास। मैं हुन योजना मन चो आजी तेरा बरख चो यात्रा ने चिना लगाउक चाहेंसे। जेके मैं आपलो सबले लगे चो मानले से। जेकि न खाली गरीब मन चोे, मेहरार मन चोे, स्कूल चो पीला मन चो, बल्कि आम मनुक चो जीवना ने जेकि बदलाव आनुन दिली। बस्तर ले धरून सरगुजा तक ले जे योजना मन न खाली लोग मन चो काजे गोटोक राहत दिली बल्कि हिन्दुस्तान ने जेके सबले ज्यादा चर्चा मिरली हुन आय।
  • मुख्यमंत्री खाद्यान सहायता योजना, खाद्य अउर पोषण बनातो ने अब्बल 58 लाख 80 हजार परिवार मन के खाद्यान सहायता, 1 रूपया किलो चाउर, लोन चो योजना अउर चना चो योजना। ये गोटोक अभुतपूर्व योजना आय, जेचो आमी सफलता पूर्वक क्रियान्वयन करूंसे।
  • दुसर योजना, जेबे मैं मुख्यमंत्री बनले तो सबले बड़े चुनौति रली कि किसान मन चो बियाज दर चो ऋण ले कसन मुक्ति करा जायेदे। करजा ले किसान लादी होउन रलो। अउर आमी सोचलु कि गोटोक असन योजना बनाउक होवो, जेचो ले किसान करजा ले मुक्ति होउनजाओ। अउर किसान के शून्य बियाज दर ने करजा देउन भाति आमन मन 150 करोड़ ले बढ़ाउन भाति 3 हजार करोड़ तक होलीसे जे 14 प्रतिशत बियाज दर उपरे मिरते रली हुन शून्य बियाज दर ने करजा मिरेसे। ये किसान मन चो काजे बड़े राहत आय।
  • तीसर बड़े योजना समर्थन मूल्य ने धान घेनतोर। गेलो 13 बरख मन ने 5 करोड़ 60 लाख मीट्रिक टन धान घेनतोर 53 हजार करोड़ रूपया किसान मन के भुगतान होली।
  • जेबे मैं मन चो लगे योजना चो गोट करेंसे, तेबे सबले ज्यादा मोके पसंद आसे अउर जेचो सबले ज्यादा सुवागत होयसे। मुख्यमंत्री बाल ह्दय योजना, जेने हजार-हजार पीला मन के ह्दय चो आपरेशन होली। आजी हुन मन सुरखित जीवना जीवसोत। स्कूल जासोत, हुन मन चो मुख मंडल ने मुस्कान (मुचकी) आसे। येई मुस्कान (मुचकी) छत्तीसगढ़ चो येतो दिना चो मुस्कान (मुचकी)  बनेदे। गोटोक योजना जेचो बारे ने जरूर जिकर करेेंदे। 108, 102 एम्बुलेंस बेवस्था। लाख-लाख परिवार मन चो सुराखा चो आय। जुवान मन चो सड़क चो दुर्घटना चो चलते होतो बिती, होतो बिती मोउत ले बचालू। अउर येई योजना चो लाभ जमाय छत्तीसगढ़ नेयेंसें
  • बन क्षेत्र ने रतो बिता बनवासी भाई मन खे काजे गोटोक दिक्कत रली टेमरू पान जमा करतोर अउर जमा करतो चो मेहनताना। मोचो खियाल ने 2003 ने 350 चो येचो दर रली, जेके बढ़ाउन भाति 1500 रूपया प्रति बोरा करा गेलीसे। मेहनताना बोनस मिलाउन भाति 13 बरख मन ने 2600 करोड़ चो बटवारा करा गेलीसे। दुसर बन उपज जसन कि अमली, चिरौंजी, आमा टाक, महु अउर सरगी बीज लाख चो समर्थन मूल्य ने घेनतो चो काजे 71 करोड़ चो बटवारा करा गेलीसे। येचोय संगे ये मन चो पांय मन ने कांटा नी गडो। बिहाने-बिहाने आमचो बहिन मन टेमरूपान जमा करतो काजे जाउआत, ये मन चो काजे अउर भाई मन चो काजे बले 13 लाख टेमरूपान जमा करतो लोग मन चो निःशुल्क चरण पादुका (जूता) बाटतोर 140 करोड़ अउर मेहरार मन चो साड़ी बाटतोर 34 करोड़ चो योजना।
  • बेटी मन के स्कूल जातो ने दिक्कत होते रली। हुन मन स्कूल  जाउक छंाडुन देते रला, खुबे बड़े संख्या ने ‘‘ ड्रापआउट’’ होते रली। आजी हाई स्कूल स्तर तक ले अनुसूचित जाति, अनुसूचित जन, जाति, बी.पी.एल. परिवार चो लेकी मन चो काजे निःशुल्क साइकिल योजना दिलो काजे जे बेटी मन 65 प्रतिशत चे स्कूल जाउक सकते रला। हुन चो प्रतिशत बाढ़ुन भाति 93 प्रतिशत होलीसे। गोटोक योजना चो इतलो बडे़ असर मैं दखले अउर बेटी मन के येचो ने आपलो गॉव ले आपलो घर ले दुरीया स्कूल जातो ने सुविधा होयसे।
  • उच्च शिक्षा करजा बियाज अनुदान योजना, गरीब परिवार मन चो महाविद्यालय मन अउर पढ़तो लेकी मन -पढ़तो लेका मन के एक प्रतिशत दर ने चार लाख रूपया तक ले करजा देतोर। नक्सल प्रभावित क्षेत्र मन चो पढ़तो पीला मन के शून्य बियाज दर ने करजा देतोर।
  • गोटोक महत्वपूर्ण योजना जे आमचो कॉलेज जातो बिती बेटी मन चो काजे लेकी मन चो काजे रली, जेथा कॉलेज इंजीनियरिंग कॉलेज आरू, पॉलीटेक्निक कॉलेज। येबे आमन मन प्राइमरी ले धरून 12वीं तक के निःशुल्क करूंन रलू येदांय हुन के बढ़ाउन निःशुल्क पढ़ाई चो व्यवस्था करलूसे।
  • इंजीनियरिंग आरू पॉलीटेक्निक ने पढ़तो बिती लेकी मन चो बले पढ़ई शुल्क माफी करा गेलीसे।
  • मुख्यमंत्री लेकी बिहाव योजना येने सरकार चो बाटले 15 हजार चो राशि मिरते रहे। लगभग 67 हजार लेकी मन चो कन्या दान योजना मन ने येचो फायदा मिरलीसे, अउर येई योजना न खाली समाज के जोडुआय बल्कि सपाय समाज चो बेटी मन चो गोटकी संगे कन्या दान योजना ले बिहाव होउआय। आमी सपाय शामिल होउअंाव, हुन परिवार मन चो हरीक दखते बनुआय।
  • सियान मन काजे कोनी योजना नी रली, हुन मन चो तिरथ यात्रा चो काजे अउर मोके लागली कि हुन मन चो अगर पीला मन गरीब आसोत हुन मन नी रउन जाओत। येचोई काजे गोटोक बेटा चो भूमिका निभातो असन काय काजे कि हुन मन मोेके गोटोक बेटा चो बराबर मानला सोत, हुन मन चो काजे गोटोक योजना बनाले। दुई लाख सियान लोग मन के येबे तक ले निःशुल्क तिरथ यात्रा चो योजना चो फायदा मिरलीसे अउर निश्चित रूप ले येई योजना हुन मन चो जीवना ने हरीक आनुआय।
  • कौशल विकास अउर उच्च शिक्षा आमचो काजे गोटोक चुनौती रली। आजी 27 जिला मन ने कौशल उन्नयन चो काजे ‘‘लाइवलीहुड’’ कॉलेज बनालुंसे। सपाय विकासखण्ड मन ने येचो व्यवस्था करा जायसे। अउर येमे आजी छत्तीसगढ़ ने कौशल उन्नयन चो पाटकुती जे पीला मन तीन प्रतिशत रला हुन मन चो संख्या 15 प्रतिशत होउंन गेलीसे। अउर रोजगार चो नंगत साधन हुन मन के उपलब्ध होयसे।
  • मैं पलटून दखे से तो छत्तीसगढ़ बनली तेबे राष्ट्रीय स्तर चो कोनी संस्थान नी रली। आजी आमचो लगे आई.आई.टी., एन.आई.टी, आई.आई.एम., ट्रिपल आई टी., नेशनल लॉ यूनिवर्सिटी, 10 ले आगर मेडिकल कॉलेज काई नाहाले 49 इंजीनियरिंग कॉलेज हुन मन चो संख्या बढ़ुन गेलीसे। येई छत्तीसगढ़ ने जुवान मन के नुवा अवसर देतो चो काजे गोटोक बड़े कदम होली से। कितली असन योजना मन चो जिकर करूक चाहेंसे। जे माननीय प्रधान मंत्री साहेब येचो शुरूआत करला येचो क्रियान्वयन आमी करूंसे।
  • प्रधान मंत्री उज्जवला योजना ने छत्तीसगढ़ ने 25 लाख बहिन मन के 200 रूपया ने गेस सिलेण्डर आरू चुल्हा दिया जायेदे।
  • प्रधान मंत्री आवास योजना ने 2022 तक ले जमाय गरीब परिवार के घर मिरेदे जेमे 8 हजार करोड़ रूपया खर्चा होयदे।
  • सौर सुजला योजना ने 51 हजार गरीब परिवार मन के किसान मन चो काजे 5 हार्स पॉवर अउर तीन हार्स पॉवर चो सिचाई पम्प उपलब्ध होयदे, जेकि खुबे कम दाम ने 15 हजार, 18 हजार आरू 25 हजार रूपया चो ये किसान मन चो काजे पम्प उपलब्ध होयदे। जन-जन चो नंगत जीवना खुशहाली आरू सुरखित भविष्य चो सपना साकार होवो, अउर जेबे कि आपन मन मोके अवसर दिला साहस तो आमी आपलो जमाय टीम चो संगे इच्छा शक्ति अउर बिश्वास चो संगे हुन काम करूक जाउसे। जे आपन चो जीवना ने खुशहाली आनेदे आपन मन के लागेदे कि नुवा राज्य चो निर्माण अटल बिहारी बाजपेयी करलासोत। आपन मन मोचो असन मनुक उपरे भरसा करला साहास, जे गोटोक सामान्य परिवेश ले चलुंन भाति पार्षद ले मुख्यमंत्री तक चो यात्रा आपन चो कारण ने होली। मोके लागेसे कि येचो पाटकुती सिरप अउर सिरप आपन चो आशीर्वाद आय। मैं कोशिश करेंदे कि येतो बिता समया ने येचो ले अउर नंगत जेकि आमी करूंक सकु, करूंदे।

पुरूष उदघोषक

  • माननीय मुख्यमंत्री साहेब, आज चो दिने प्रदेश आरू देश ने अर्थव्यवस्था, मुद्रा अउरअसने के नेउंन जितलो चर्चा होयसे उतलो आमन मन आगे केबे बले नी सुनु रलु। येचो बारे ने आपन काय सांगुआहास?

मुख्यमंत्री जी

  • येई आमचो सौभाग आय कि भारत के माननीय प्रधान मंत्री नरेन्द्र मोदी असन दृढ़संकल्पी आरू दूरदर्शी प्रधानमंत्री मिरला। हुन मन देश चो पूरे दुई पद गोट राखला कि काला धन ले मुक्ति चो बिना देश चो बड़े-बडे़ समस्या मन ले मुक्ति मिरतो संभव नी आय। भ्रष्टाचार, आतंकवाद आरू महंगाई जसन बडे़ समस्या चो जड़ कालाधन आय। येचोई काजे माननीय प्रधानमंत्री साहेब काला धन चो बिरूद्व ठेठ जंग छेडुन दिला।

महिला उद्घोषक

  • डॉक्टर साहेब, येदाय कैशलेस ट्रांजेक्शन, प्लास्टिक मनी, इलेक्ट्रॉनिक ट्रांसफर असने अउर शब्द मन चो खुबे उपयोग होयसे। येचो मतलब बले साधारण भाषा ने समझातो चो जरूरत महसूस करासाहास काय आपन?

मुख्यमंत्री जी

  • बड़े पैमाना ने नगद लेन देन चो हिसाब-किताब लुकातो नाहले नगद राशि चो सुरख्या हुन चो सदउपयोग नाहले दुरूपयोग के नेउन कितलोई समस्या मन एसोत। हुन चो अनुभव खाली भारत के चे नाई, बल्कि गुलाय दुनिया के होयसे माननीय प्रधानमंत्री साहेब प्रत्येक भारतीय नागरिक के येई सुविधा देउक चाहसोत, जे विकसित देश चो नागरिक मन के उपलब्ध आसे। येचो काजे हुन मन कैशलेस ट्रांजेक्शन नाहले बिना नगद लेन-देन के भारत ने बले बढ़ावा देतो चो मन बनालासोत। येई बेवस्था ने जुगे ले जुगे प्लास्टिक ले बनलो बिती कार्ड उपयोग ने एउआय। असने प्लास्टिक मनी चो शब्द लोकप्रिय होली।
  • ‘प्लास्टिक मनी’ चो मतलब प्लास्टिक ले बलो बिती नोट नुआय, बल्कि असन प्रणाली आय, जेने अलग-अलग तरीका चो स्मार्ट कार्ड चो जरिया ने बैंक नहाले दुसर जगह मन ने नगद रूपया चो बदला ने आर्थिक लेना-देना होउक सको। स्मार्ट कार्ड चो उल्लेख मैं येचो काजे करले काय काजे कि आमन मन प्रधानमंत्री स्वास्थ्य बीमा योजना आरू, मुख्यमंत्री स्वास्थ्य बीमा योजना असने अउर ने नगद रूपया चो नी लेना-देना नी करूंन गोटोक स्मार्ट कार्ड जारी करलूसे, जेके नेउन जेबे कोनी मनुक अधिकृत अस्पताल ने जाउआय तो रूपया चो जसन हुन कार्ड चो उपयोग हुता करूआय। मतलब हुन बिन नगद नेउन अस्पताल जाउंन आपलो इलाज कराउंन एउआय, जेने प्लास्टिक चो बनलो बिती स्मार्ट कार्ड चो बले जे प्रणाली आसे हुन नगदी लेना-देना चो माध्यम बनुन जाउआय। येई काजे येई बेवस्था के प्लास्टिक मनी बलुआत।
  • असने परकार ले ‘ई-बैंकिंग’ नहाले ‘इलेक्ट्रॉनिक ट्रांसफर’ होउआय जेबे आपन बैंक ने ‘एटीएम कार्ड’ नहाले इंटरनेट चो माध्यम ले नगद रूपया केे हाथ लगालो बिना बले आपलो बैंक एकाउंट ने जमा रकम चो लेन-देन न सिरप आपलो गांव-शहर ने बल्कि, दुसर गांव नहाले शहर ने बले करूक सकुआहास।

पुरूष उद्घोषक

  • डॉक्टर साहेब, विमुद्रीकरण चो चलतो ने आजीकाली मोबाईल ‘‘ बटुआ’’ नहाले ‘‘ ई-वॉलेट’’ असने कितली परकार चो शब्द बोलचाल ने एसोत, जेके नेउन जनता जानुक चाहेंसे। अउर येई जिनीस मन चो बारे ने जानतो के चाहेंसे ताकि सुविधा मिरलो ने हुन चो उपयोग करूक सको। काय छत्तीसगढ़ ने बले ‘ई-बटुआ’ चो उपयोग बाढ़ेदे?

मुख्यमंत्री जी

  • आर्थिक व्यवहार ने मुख्य रूप ले पांच शब्द आजी काली खुबे चलेसे।
  • ये पांच शब्द, पांच तरीका मन चो बारे ने सांगसोत जेचो ले आमी नगद रूपया लेन-देन चो बिना बले आर्थिक चो लेन-देन करूक सकुआंव।
  • पहिल शब्द आय-यू.पी.आई.। करीब-करीब सपाय बैंक मन चो आपलो ‘यू.पी.आई एप’ होउआय। जे बैंक ने आपन चो खाता आसे हुन चो यू.पी.आई. एप’ डाउनलोड करूंन खाताधारी आपलो मोबाईल चो उपयोग करूंन भाति कोनी समान के घेनतो नहाले सेवा चो उपयोग करलोने हुन चो भुगतान करूक सकुआत। येचो काजे आपन लगे स्मार्ट फोन होतो चाईऐ।
  • दुसर शब्द आय- यू.एस.एस.डी.। ये साधारण फीचर बिती मोबाईल फोन ने बले संभव आय। आपलो फोन ने स्टार 99 हैश डायल करूंन, हुन ने ईलो निर्देश मन चो पालन करूंन भाति आपलो बैंक खाता ले कोनी बले दुकान ने नानी ले नानी राशि चो भुगतान कराजाउक सकेदे। उदाहरण काजे- रायपुर ने चाय दुकान चलातो बिता अजय यादव, सूरजपुर ने असनेचे नानी कारोबार करतो बिता कैलाश देवांगन आपलो दुकान चो काजे ये सुविधा धरलासोत, जेचो ले हुन मन 5 ले 10 रूपया चो भुगतान बले मोबाईल फोन चो माध्यम ले धरसोत। असने जुवान मन चो सजगता के मैं सलाम करेंसे, जे मन समय चो संगे चालूक जानसोत अउर हुन मन चो छोटे ले छोटे कदम देश चो अर्थव्यवस्था के मजबूती देतोचो आधार बनुआत।
  • तीसर शब्द आय- प्री-पेड वॉलेट, जेके ‘ई-बटुआ’बलुआत। उदाहरण चो काजे स्टेट बैंक ऑफ इंडिया चो ‘मोबाईल एप बडी’, खुबे लोग प्रिय आय। आपन चो बैंक एकाउंट ले गोटोक निश्चित राशि ट्रांसफर होउंन आपन चो मोबाईल चो खाते ने जमा होउंन जायेंदे। आपन बिना कोनी स्वाइप मशीन चो सिरप आपलो मोबाईल चो उपयोग करूंन येई सुविधा चो फायदा उठाउक सकासे।
  • चौथा शब्द आय- कार्ड्स पी.ओ.एस.मतलब पॉइन्ट ऑफ सेलडिवाइस। येचो काजे अलग ले कोनी कार्ड नेतो चो जरूरत नी आय, बल्कि आपन के आपलो बैंक ले मिरलो एटीएम कार्ड, डेविट कार्ड, क्रेडिट कार्ड जे उपयोग ने एउआय।
  • आरू पांचवा शब्द आय- आधार इनेबल्ड पेमेंट सिस्टम। येचो काजे आपन चो बैंक खाता ने आधार कार्ड चो सीडिंग होतोर जरूरी आय। ये सबले सुरखित उपाय आय, काय काजे कि येने आपन चो माईअंगठा चो छापा आरू आधार नम्बर लेचे भुगतान होउक सकेदे।
  • छत्तीसगढ़ सरकार चो द्वारा प्रत्येक पंचायत ने स्थापित कराजातो बिती उपभोगता सेवा केन्द्र ने येई सुविधा दिया जायेदे। बलरामपुर जिला ने बडे़ पहल होलीसे जेथा सी.एस.सी.बैंक चो सेवा मन देतो काजे तियार आसोत। येई काजे मैं आपन मन ले आव्हान करेंसे कि जे खाताधारी मन आपलो बैंक एकाउंट ने ‘‘आधार सीडिंग’’ नी करालासोत, हुन लोग मन बैंक ने जाउंन एक हार आधार नम्बर नोट करूंन पकाओत, तेबे हुन मन के येई सुविधा आपलो घर चो लगे अउर खुबे आसानी ले मिरूक लागेदे। सी.एस.सी चो नगद ढंग ले काम करलोने आपन के न तो बैंक जातो चो जरूरत पढ़ेदे न एटीएम।

महिला उद्घोषक

  • मुख्यमंत्री साहेब, आजी काली कैशलेस सुसायटी चो बारे ने बले खुबे चर्चा होयसे। प्रधानमंत्री साहेब बले आव्हान करलासोत कि कैशलेस सोसायटी बनातोर चाईये। ये दिशा ने छत्तीसगढ़ सरकार द्वारा बले काय कोनी बिशेष प्रयास करागेलीसे

मुख्यमंत्री साहेब

  • मैं येबे जे उपाय मन चो जिकर करलेसे हुन सपाय उपाय ‘‘कैशलेस सोसायटी’’ बनातोचो बाटेचे नेउन जासोत।
  • जेबे व्यक्तिगत रूप ले आमी नगद राशि ले लेन-देन नी करूआ अउर सपाय लोग जेबे कार्ड नहाले इंटरनेट चो माध्यम ले लेन-देन करूक लागदे तेबे करंेसी नोट मन के आपलो जेब ने नेउन बुलतोर चो समस्या चे खतम होउन जायेदे अउर असने परकार ‘नगद विहिन समाज’’ कैशलेस सोसायटी’’ चो निर्माण होयदे। संगे संगे चे नगदी चो दुरूपयोग बले थमेदे।
  • छत्तीसगढ़ ने आमी हुन स्तर ने प्रशिक्षण देउक जाउसे, जसन कि आम चुनाव चो संचालन चो काजे दिया जाउआय, जेने अधिकारी कर्मचारी लेनेउन मतदाता तक के येई जानकारी मिरूंन जाउआय कि हुन के कसन परकार ले बोट डारतोर आय अउर कसन परकार चो सुविधा सुरख्या आपनातोर आय।
  • आमन मन सपाय बैंक मन ले बललुसे कि हुन मन आपलो खाताधारी मन के प्रशिक्षित करोत कि हुन मन कसन परकार ले एटीएम, इंटरनेट ले भुगतान नहाले एचोले जुडलो कितलोई सुविधा मन चो उपयोग करोत।
  • राज्य शासन आपलो स्तर ले बले सपाय पंचायत मन ने सी.एस.सी. नहाले उपभोगता सेवा केन्द्र के सक्षम बनाएसे। अउर येचो काजे प्रशिक्षित करागेलो लोग मन चो माध्यम ले गॉव गॉव ने प्रशिक्षण चो आयोजन कराजायेसे।

पुरूष उद्घोषक

  • माननीय मुख्यमंत्री साहेब, ‘कैशलेस याने नगद विहिन लेन-देन’ चो काजे बले तो खुबे असन सावधानी मन चो जरूरत पढ़ेदे। नुवा-नुवा काम करतो ने लोग मन ले कितलोई गलती मन होउक सकुआय, जेचो फायदा मतलबी लोग मन उठाउक सकुआत। असन समया ने असन काय सावधानी मन अपनातोर चाईये, जेचो लेकि गलती मन  चे नीहोवो।

मुख्यमंत्री साहेब

  • असलतौर ने ‘कैशलेस ट्रांजेक्शन’ नहाले ‘नगद विहिन लेन-देन’ ने जितलो सुविधा आसे, उतले पैमाना ने सतर्कता आरू सावधानी राखतोर चो जरूरत बले आसे अउर येचो काजे गॉव हो नहाले शहर किसान हो नहाले कारोबारी मेहरार हो नहाले मनुक, पीला हो नहाले जुवान, जमाये स्तर ने लोग मन के समझातोर जरूरी आय, ताकि हुन मन सतर्कता चो संगे नुवा सुविधा मन चो उपयोग करोत अउर कोनी बले ढं़ंग चो ठगी चो सिकार नी होउक सकोत।
  • रिजर्व बैंक ऑफ इंडिया असन साफ करूंन दिलीसे कि कोनी बले बैंक आपलो खाताधारक ले फोन ने कोनी जानकारी नी नेयदे। येई काजे बैंक चो नाव नेउन फोन करतो बिता के कड़ाई ले मना करतो ने कोनी संकोच नी करा। अउर जादा अच्छा आय कि हुन चो संगे गोट चे नी करा, काय काजे कि गोट बात ने फसाउन हुन मन असन जानकारी मन निकराउन नेउआत। जेचो ले कि आपन मन के नुकसान होउक सकुआय।
  • असन उपाय मन चो बारे ने बड़े तौर ने प्रशिक्षण देतो चो बेवस्था बले करा जायेसे।

महिला उद्घोषक

  • येई समया ने प्रदेश ने किसान मन ले समर्थन मूल्य ने धान घेनतो चो बड़े अभियान चलेसे। ‘ नोटबंदी ’ चो कारण काय ये ने कोनी समस्या ईलीसे? अउर सरकार येचो काजे काय इंतिजाम करलासोत?

मुख्यमंत्री साहेब

  • असल तौर ने समर्थन मूल्य ने धान घेनतो ले किसान भाई -बहिन मन चो बरख भर चो बजट बुनआय। आमन मन हमेशा चो असन येहार बले धान घेनतो चो खुबे अच्छा व्यवस्था करलूसे।
  • 1333 सहकारी समिति मन चो 1889 उपार्जन केन्द्र मन ने धान बिकतो बिता किसान मन के हुन मन चो उपज चो ऑनलाइन भुगतान करतो चो बेवस्था आसे। जिला सहकारी बैंक मन के येबे तक ले लगभग 6 सौ करोड़ नगद रूपया उपलब्ध करागेलीसे अउर आगे बले येने कोनी समस्या नीयेदे।

महिला उद्घोषक

  • सुनतो लोग मन ! आपन मन चो प्रतिक्रिया मन आमके आपन चो चिट्ठी, सोशल मिडिया-फेसबुक, ट्विटर चो संगे एस.एम.एस. ले बले जुगे संख्या ने मिरेसे। येचो काजे आपन सपाय के खुबे-खुबे धन्यवाद।
  • आगे बले आपन आपलो मोबाईल चो मेसेज बॉक्स ने त्ज्ञळ चो पाटकूती स्पेस नेउंन आपलो बिचार लिखुंन 7668-500-500 नम्बर ले पठाते रहा अउर संदेश चो आखरी ने आपलो नाव अउर पता लिखुंक नी भुलका।
  • मुख्यमंत्री साहेब, येहार आमचो लगे सुनतो लोग मन चो खुबे करूंन प्रतिक्रिया ‘नोटबंदी’ के नेउन आसे। उसन तो आपन बिस्तार ले येचो बारे ने सांगुन दिला साहास, मान्तर आपन हुन मन चो चिठ्ठी चे अउर एसएमएस चो जवाब ने काय सांगुक चाहासे?

मुख्यमंत्री साहेब

  • इतलो बडे़ संख्या ने एसएमएस अउर चिठ्ठी चो द्वारा आपलो प्रतिक्रिया व्यक्त करतो काजे मैं सबले पहिल आपन मन के धन्यवाद देयंदे अउर मोके खुबे हरीक लागे से कि प्रदेश चो कोना कोना ले सुनतो लोग मन नोटबंदी चो तारीफ करलासोत। येई निर्णय के अमल ले आन्तो काजे हुन मन आपलो स्तर ने सहयोग करूक चाहसोत। ये जजबा चे आमके समाज, प्रदेश अउर देश चो काजे साहसिक आरू बडे़ निर्णय नेतो ने मद्द करूआय। मैं धन्यवाद देतो चाहेंदे राजनांदगाूंव चो अरूण शुक्ला आरू अर्पणा धमतरी चो शुभम बघेल पकरिया ले कोमल सिंह, राहुल सेन, दुष्यंत साहू, नीलकांत खट्टर अउर असने आमचो हजार-हजार साथी मन के जे मन एसएमएस चो माध्यम ले चिठ्ठी चो माध्यम ले आपलो बिचार राखला हुन सपाय के मैं एक हार फेर ले धन्यवाद देतो के चाहेंदे कि आपन निश्चित रूप ले आपलो सुझाव आरू सलाह देते रहा। सरकार चो नीति मन चो क्रियान्वयन ने आपन चो असने सुझाव आमी सपाय चो काजे मार्गदर्शक होदे।

पुरूष उद्घोषक  

  • सुनतो लोग मन, येदाय बारी आय ‘क्विज’ चो।

सात नम्बर चो ‘क्विज‘ चो सवाल रली-

‘सौर सुजला योजना चो भितरे दिया जातो बिती पम्प कसन चलदे?

जेचो सही जवाब आय- ।ण् सौर ऊर्जा

  • सबले झटके जोन पांच सुनतो लोग मन सही जवाब पठालासोत, हुन मन चो नाव आय-

01.          शेखर कुमार, गांव अतरगढ़ी, जिला बेमेतरा

 

02.          अनिमा भगत, मानपुर, जिला सरगुजा

 

03.          डिकेश्वर साहू, मरटरा, जिला बेमेतरा

 

04.          वीणा वंडलकर, रायपुर

 

05.          गजेन्द्र वर्मा, जामडीह, जिला बलौदाबाजार

 

महिला उद्घोषक

  • अउर सुनतो लोग मन येदा समया आय आठ नम्बर चो ‘क्विज’ चो।

जेचो सवाल आय-

  • छत्तीसगढ़ ने पंचायत स्तर ने ‘सी.एस.सी’ कोन संस्था चो बराबर सेवा करूक सकदे?
  • येचो सही जवाब                       A पेट्रोल पम्प नहाले

                                                          B बैंक

                ने ले कोनी गोटोक आय।

  • आपलो उतर देतो काजे आपलो मोबाईल चो मेसेज बाक्स ने फ। लिखा अउर स्पेस देउन । नहाले ठ जो बले आपन के नंगत लागेदे हुन गोटोक आखर लिखुन 7668-500-500 नम्बर ले पठाउन दिया। संग ने आपलो नाव अउर पता जरूर लिखा।
  • आपन सपाय रमन चो गोठ सुनते रहा अउर आपलो प्रतिक्रिया मन के आमके जनाते रहा। येचो संगे आज चो गोठ बात (अंक) आमी येथाय सारूंसे। येतो गोठ ने 8 जनवरी के होयंदे आपन मन संगे फेर भेटघाट। तेबे तक काजे दिया आमके बिदा। जुहार।

 

 

 

 

Date: 
11 December 2016 - 10pm